| e-texts navigator |
| Wylie |
305b1 རབ་བོ།། ཡང་དག་མི་ཕྱེད་མཉམ་གཞག་གོ། སྲོག་མེད་འཛིན་པ་མེད་པ་ཉིད།། བྱ་དང་བྱེད་པའི་ཐ་ཚིག་ལས།། ཡོད་དང་མེད་པའི་མཐའ་ལས་གྲོལ།། ཉོན་མོངས་སྤངས་པར་མི་འདོད་ཅིང་།། ཡེ་ཤེས་ལེན་པར
305b2 འདོད་མ་ཡིན།། མི་ལེན་པས་ན་བདག་མེད་ཅིང་།། ཅི་ཡང་མཉམ་ཉིད་ཡེ་ཤེས་འདོད།། རྟོག་པ་མ་ཞུགས་ཕྱོགས་དང་བྲལ།། ཡོད་མེད་གཉིས་ཀྱི་མཐའ་ལས་འདས།། བསམ་གཏན་ཉིད་ལ་བསམ་དུ་མེད།། ཡང
305b3 དག་དོན་ལ་བསྒྲུབ་ཏུ་མེད།། སྒྲོན་མའི་ཡུལ་ལ་བཙལ་དུ་མེད།། སྣང་བ་ཉིད་ལ་གཟུང་དུ་མེད།། ཡང་དག་སྐུ་ལ་བལྟ་དང་བྲལ།། རང་རིག་དོན་ལ་བསྒྲུབ་ཏུ་མེད།། སྣང་བའི་ཡུལ་ལ་འཛིན་དུ་མེད།། ཡོན་ཏན་རྩལ
305b4 ལ་འགག་པ་མེད།། མཚན་མའི་ཆོས་ལ་ཞེ་འདོད་མེད།། དག་པའི་འོད་ཟེར་ཐ་སྙད་སྟོང་།། ཡོན་ཏན་སྤྲུལ་པ་ཅིར་ཡང་སྤྲུལ།། ད་ལྟའི་རིག་པ་ཆོས་ཀྱི་སྐུ།། མ་འོངས་ཚིག་ལས་འདས་པའོ།། མངོན་སུམ་མི་གནས
305b5 ཡུལ་ལས་འདས།། ཆེ་བའི་ཆེན་པོ་རང་བཞིན་གནས།། བསྒྲུབ་པ་མ་ཡིན་འཁྲུལ་པ་སངས།། རྟོགས་པ་མ་ཡིན་དོན་དང་མཇལ།། སྟོང་པ་གསལ་བ་འོད་ཀྱི་སྐུ།། ཡེ་ཤེས་མཛེས་པ་ལྷན་ནེའོ།། སྣ་ཚོགས་འཕྲོ་བས
305b6 དོན་གཉིས་མཐོང་།། ཐམས་ཅད་གང་བས་ཡུལ་མེད་ཅིང་།། གཟའ་གཏད་མེད་པར་ས་ཉིད་ཐོབ།། གོམ་པ་གཅིག་གིས་ཕ་རོལ་ཕྱིན།། སྟོང་པ་མུ་མེད་གསལ་ལ་མཛེས།། གསལ་བ་ཡུལ་མེད་གཟུང་དུ་མེད།། སྣང
iiif viewer powered by OpenSeadragon
