| e-texts navigator |
| Wylie |
265a1 གསལ་བ་ཡོད་པའི་ཕྱིར།། མེ་ལོང་ལྟ་བུའི་ཡེ་ཤེས་བྱུང་།། གསལ་བ་ལ་གཉིས་མེད་ཡོད་པའི་ཕྱིར།། མཉམ་པ་ཉིད་ཀྱི་ཡེ་ཤེས་བྱུང་།། གཉིས་མེད་ལ་མཐོང་བ་ཡོད་པའི་ཕྱིར། སོ་སོར་རྟོག་པའི་ཡེ
265a2 ཤེས་བྱུང་།། མཐོང་བ་ལ་ཚད་ཡོད་པའི་ཕྱིར།། བྱ་བ་གྲུབ་པའི་ཡེ་ཤེས་བྱུང་ངོ་།། ཡེ་ཤེས་ལས་འོད་བྱུང་སྟེ།། ཡེ་ཤེས་མི་འགྱུར་བའི་ཕྱིར་མཐིང་གར་བྱུང་།། ཡེ་ཤེས་དག་པའི་ཕྱིར་དཀར་པོར་བྱུང་ངོ་།། ཡེ་ཤེས་ལ
265a3 ཡོན་ཏན་འབྱུང་བའི་ཕྱིར་སེར་པོར་བྱུང་ངོ་།། ཡེ་ཤེས་ལ་དབང་རྫོགས་པའི་ཕྱིར་དམར་པོར་བྱུང་ངོ་།། ཡེ་ཤེས་ལ་ཕྲིན་ལས་རྫོགས་པའི་ཕྱིར་ལྗང་གུར་བྱུང་ངོ་།། དེ་བཞིན་དུ་སེམས་ཅན་ཀུན་ལ་ཡང་དེ་བཞིན་གནས
265a4 སོ།། གསང་སྔགས་ཐམས་ཅད་ཀྱི་མདོ་ཡང་དེ་བཞིན་ནོ།། སངས་རྒྱས་ཐམས་ཅད་ཀྱི་དགོངས་པའི་ཚད་ཀྱང་དེ་བཞིན་ནོ།། དེ་བཞིན་གཤེགས་པའི་དགོངས་པ་རང་གྲོལ་བ་ཆེན་པོའོ།། མན་ངག་ཐམས་ཅད་ཀྱི་མདོ
265a5 ཡིན་ནོ།། དེ་བཞིན་དུ་རྟོགས་པར་གྱིས་ཤིག། རིགས་ཀྱི་བུ་དེ་བཞིན་དུ་ཤེས་པའི་རིགས་ཀྱི་བུ་དེ་ནི། ཡོངས་སུ་མྱ་ངན་ལས་འདའ་བར་འགྱུར་རོ།། ཞེས་རིག་པ་རང་ཤར་ཆེན་པོའི་རྒྱུད་ལས། རིག་པ་དང་ཡེ་ཤེས་ཀྱི
265a6 ལེའུ་སྟེ་རེ་གཉིས་པའོ།། །། དེ་ནས་ཡང་གསང་བའི་བདག་པོས་འདི་སྐད་ཅེས་གསོལ་ཏོ།། ཀྱེ་ཀྱེ་བཅོམ་ལྡན་མ་འོངས་སྐུ། ཐོག་མེད། ཀྱང་བྱུང་། རྟོག་མེད་སངས་རྒྱས་རང་གྲོལ་ལ།། འཛིན་པའི
iiif viewer powered by OpenSeadragon
