| e-texts navigator |
| Wylie |
252b1 །། བྱིན་རླབས་རང་ཤར་ཡོན་ཏན་ཀུན་གྱི་རྩེ།། བསྐུར་མེད་རང་རྫོགས་ཕྱག་རྒྱ་ཀུན་གྱི་རྩེ།། མ་བཏབ་ལྷུན་གྲུབ་སྨོན་ལམ་ཀུན་གྱི་རྩེ།། དུས་མེད་འཆར་བ་སྣང་བ་ཀུན་གྱི་རྩེ།། མ་བསྐྱེད་རྫོགས་པ་ལྷ་རྣམས་ཀུན
252b2 གྱི་རྩེ།། དེ་བཞིན་རྫོགས་པ་རྩེ་མོ་སྤྱི་བཅིངས་ལྟ་བ་ཡིན་པར་གསུངས། རྡོ་རྗེ་སེམས་དཔའི་སྤྱི་བཅིངས་ལྟ་བ་འདི།། རྒྱལ་བ་ཀུན་གྱི་དགོངས་པའི་གསང་བ་ཡིན།། རི་བོ་ཀུན་གྱི་སྤྱི་ནི་རི་རྒྱལ་ལྷུན་པོས
252b3 བཅིངས།། ཐེག་པ་ཀུན་གྱི་སྤྱི་ནི་ཨ་ཏི་ཡོ་གས་བཅིངས།། རྒྱུད་རྣམས་ཀུན་གྱི་སྤྱི་ནི་རྒྱུད་རྒྱལ་འདི་ཡིས་བཅིངས།། ཡེ་ཤེས་ཀུན་གྱི་སྤྱི་ནི་སྒྲོན་མ་གཉིས་ཀྱིས་བཅིངས།། རིག་པ་ཀུན་གྱི་སྤྱི་ནི་ལུ་གུ་རྒྱུད་ཀྱིས
252b4 བཅིངས།། ཆོས་སྐུ་ཀུན་གྱི་སྤྱི་ནི་ཀ་དག་ཆེན་པོས་བཅིངས།། ལོངས་སྐུ་ཀུན་གྱི་སྤྱི་ནི་ཚོམ་བུ་ལྔ་ཡིས་བཅིངས།། སྦྲུལ་སྐུ་ཀུན་གྱི་སྤྱི་ནི་རྡོ་རྗེ་སེམས་དཔས་བཅིངས།། སངས་རྒྱས་ཀུན་གྱི་སྤྱི་ནི་འོད་དཔག་མེད་པས
252b5 བཅིངས།། སྤྱི་བཅིངས་རྒྱལ་པོ་སངས་རྒྱས་ཡེ་ཤེས་ལུང་།། རང་གི་སྙིང་ལ་རྫོགས་ལུགས་དེ་བཞིན་ནོ།། སྤྱི་བཅིངས་རྒྱལ་པོ་ཡེ་ཤེས་ཚིག་ལས་འདས།། སངས་རྒྱས་ཀུན་གྱི་སྤྱི་བཅིངས་ཀུན་ལ་མཉམ་པར
252b6 གནས།། སྤྱི་བཅིངས་ཤེས་ན་སངས་རྒྱས་ཀུན་གྱི་རང་ལུས་རྙེད།། སངས་རྒྱས་དགོངས་པ་དེ་ལྟར་སྣང་བའོ།། ཞེས་རིག་པ་རང་ཤར་ཆེན་པོའི་རྒྱུད་ལས། རི་བོ་སྤྱི་བཅིངས་ཀྱི་ལྟ་བ་བསྟན་པའི་ལེའུ་སྟེ་ང་བཞི་པའོ།། །
iiif viewer powered by OpenSeadragon
