| e-texts navigator |
| Wylie |
233b1 གཤེགས་སོ།། དེ་ནས་ཡང་འཇིག་རྟེན་ཕུང་བྱེད་འདོད་ཆགས་ཀྱི་གཙོ་མོས་འདི་སྐད་ཅེས་གསོལ་ཏོ།། ཨེ་མ་ཧོ་ལྟ་བ་དང་ནི་སྒོམ་པ་དང་།། དེ་བཞིན་སྤྱོད་པའི་རྣལ་འབྱོར་དང་།། དེ་རྣམས་གསང་སྔགས་དོན་དུ
233b2 འདོད།། དེ་ཡང་བསྟན་པ་འདི་ལྟ་སྟེ།། རང་བྱུང་བཅོས་པ་མེད་ན་སྤྱོད་པ་ཆེན་པོ་ཡིན།། གསལ་ལ་འཛིན་པ་མེད་ན་སྒོམ་པ་ཆེན་པོ་ཡིན།། རྒྱ་ཆད་ཕྱོགས་ལྷུང་མེད་ན་ལྟ་བ་ཆེན་པོ་ཡིན།། དེ་བཞིན་ལྟ་བ་སྒོམ་པ
233b3 ཡང་།། རང་བྱུང་འཛིན་མེད་རྣམ་དག་ནི།། གཅིག་དང་དུ་མ་མེད་པར་རྟོགས།། རྡོ་རྗེ་སེམས་དཔའི་རང་སྣང་ནི།། རང་གྲོལ་འཛིན་མེད་ངང་དུ་རྟོགས།། རང་བྱུང་རྟགས་ཀྱི་སངས་རྒྱས་ནི།། རང་ཉིད་སངས་རྒྱས
233b4 དངོས་ཡིན་པས།། ཡེ་ཤེས་དག་པའི་ཆོས་སྐུ་ལ།། རང་ཉིད་ལྷ་ཡི་དཀྱིལ་འཁོར་ཉིད།། ཡེ་ཤེས་ལམ་ལ་དགག་སྒྲུབ་མེད།། འཛིན་པའི་ཡུལ་ལ་བདག་འཛིན་མེད།། སངས་རྒྱས་ཆོས་ལ་བདག་རྟོགས་མེད།། ཡང
233b5 དག་ལམ་ལ་ཞེ་འདོད་མེད།། ཡང་དག་སྐུ་ལ་ལྷ་དང་བྲལ།། ཉིད་ལས་མི་གཞན་འཁོར་ཉིད་ཀྱང་།། རང་ལས་བྱུང་ཞིང་རང་ལ་ཐིམ།། སངས་རྒྱས་ཀུན་གྱི་མཛད་པ་ནི།། ཡེ་ཤེས་དཔལ་རོལ་པར་མཛད་པའི
233b6 སྐུ།། རྣམ་དག་སྟོང་པའི་ཡེ་ཤེས་མཁའ་ལ་གསལ།། རང་བྱུང་འཛིན་པ་མེད་པའི་ཆོས།། ཡེ་ཤེས་འཛིན་པ་དངོས་དང་བྲལ།། ལམ་ཤེས་ཉིད་ལ་ལྟོས་པ་མིན།། དེ་བཞིན་གཤེགས་པ་ཉིད་དུ་ཤེས་པའོ།། ཞེས་བརྗོད
iiif viewer powered by OpenSeadragon
