| e-texts navigator |
| Wylie |
212b1 བསྟན།། རང་སང་ཆོས་ཉིད་བདེ་ཆེན་ནི།། སྣང་བ་མཐའ་ཡས་ཞིང་དུ་རྟོགས།། རྟོག་མེད་མཉམ་ཉིད་ཡེ་ཤེས་ནི།། མི་གནས་ཐིག་ལེའི་ཀློང་དུ་རྟོགས།། རང་བྱུང་རིག་པའི་ངོ་བོ་ནི།། ཙིཏྟའི་དཀྱིལ་འཁོར་ཀློང་དུ
212b2 རྟོགས།། རང་བྱུང་མིག་གི་སྒྲོན་མ་ནི།། ནམ་མཁའ་སྟོང་པའི་དཀྱིལ་དུ་རྟོགས།། སྐུ་ལྔ་ཡབ་ཡུམ་བཅུ་པོ་ཡང་།། ཚོམ་བུར་སྣང་བའི་དུས་ན་རྟོགས།། ཡེ་ཤེས་འགག་མེད་ཤར་བ་ཡང་།། བཞི་སྦྱོར་ཡེ་ཤེས་སྣང་བར
212b3 རྟོགས།། རིག་པ་སྣ་ཚོགས་འབྱུང་བ་ཡང་།། ལྷུན་གྲུབ་བདེ་ཆེན་ས་ལ་རྟོགས།། སྐྱེ་ཤི་མེད་པའི་རྡོ་རྗེ་ནི།། ཀ་དག་ཆེན་པོའི་ས་ལ་རྟོགས།། མ་འགགས་རྟོག་མེད་ངོ་བོས་སྟོང་།། རིག་པ་འགག་མེད་ཀློང་དུ
212b4 རྟོགས།། དེ་ཡང་བཤད་ལུགས་འདི་ལྟ་སྟེ།། རྟོགས་པར་བྱེད་པ་ཤེས་རབ་སྟེ།། རྟོགས་པའི་རྒྱུ་ནི་རིག་པའོ།། མེད་པ་ཤེས་པས་རྟོགས་ཤེས་བྱ།། རྟོགས་པའི་ངོ་བོ་མཐོང་བའོ།། མཐོང་བའི་རང་བཞིན་འདི་ལྟ
212b5 སྟེ།། ནམ་མཁའ་སྟོང་པའི་ཀློང་དཀྱིལ་དུ།། སྒྲོན་མ་རྣམ་གཉིས་མ་འགགས་པས།། ཡུལ་ལ་རྟོག་མེད་གསལ་བ་ནི།། རང་བྱུང་རང་ཤར་སྣང་བའོ།། དེ་ལྟར་མཐོང་ན་རྟོགས་པའི་མཆོག། མཐོང་དང་རྟོགས་པ་ཤེས
212b6 རབ་གསུམ།། སངས་རྒྱས་ཀུན་གྱི་དགོངས་པ་ཡིན།། རྟོག་མེད་རྒྱལ་པོ་ཤེས་རབ་རང་བྱུང་འདི།། རྟོགས་པ་མེད་ཅིང་མཐོང་བའི་ཡུལ་ལས་འདས།། མཐོང་དང་རྟོགས་དང་ཐོབ་པ་གསུམ།། མན་ངག་ཀུན་གྱི་ཡང
iiif viewer powered by OpenSeadragon
