| e-texts navigator |
| Wylie |
190b1 མནན་ཏེ། ཕྱའམ་དབང་ཕྱུག་འཁོར་དུ་སྐྱེ་བར་འདོད་དོ།། རྩོད་པ་ལྷུར་ལེན་པའི་བལྟ་བ་ནི་འདི་ལྟ་སྟེ། རང་གི་བདེན་པ་ཁོང་དུ་བཅུག་སྟེ། ཕ་རོལ་པོ་སུན་འབྱིན་པ་ལ་དོན་རེ་བ་དག་ཀྱང་ཡོད་དོ། ལོག་པའི
190b2 དཀའ་ཐུབ་ལ་གཙོར་བྱེད་པ་དག་ཀྱང་ཡོད་དོ། འཇིག་རྟེན་འདི་ལ་ཞེན་པ་ནི་འཇིག་རྟེན་རྒྱང་འཕེན་པ་ཞེས་བྱ་སྟེ།། འཇིག་རྟེན་འདིའི་བྱ་བ་ལ་སྤྱོད་པའོ།། ཡང་རང་གི་བདེན་པ་ཁོང་དུ་བཅུག་ནས།། གཞན་ཁྱད་དུ
190b3 གསོད་པ་དག་ཀྱང་ཡོད་དོ།། ལ་ལ་ཆ་ལུགས་ཀྱིས་དོན་འཚོལ་བ་དག་ཀྱང་ཡོད་དོ།། དེ་ཡང་སྐྲའི་ལ་བ་བྱས་ཏེ་དོན་འཚོལ་བ་དག་ཀྱང་ཡོད་དོ།། རས་རྐྱང་པ་རེས་ལུས་དཀྲིས་ཏེ་ང་ལ་ནང་གི་དྲོད་སྐྱེས་ཟེར་བ་དག
190b4 ཀྱང་ཡོད་དོ།། ཕྱག་མཚན་དུ་ཁ་ཊྭཱཾ་ཀ་དང་ཅང་ཏེའུ་ཐོགས་ནས་ང་ནི་སྤྲུལ་པའི་སྐུ་ཡིན་ཟེར་བ་དག་ཀྱང་ཡོད་དོ།། ཁྱོད་ཀྱིས་དགེ་བ་ཅི་བྱས་ཀྱང་ང་ལ་ཕན་ནོ་ཟེར་ཞིང་དོན་དེ་ལ་ལྟོས་པ་དག་ཀྱང་ཡོད་དོ།། རང་གི
190b5 རིག་པས་ཕ་རོལ་གྱི་རིག་པ་སུན་ཕྱུང་ནས་ང་ཡིས་བྱས་པ་ཡིན་ནོ་ཞེས་ཟེར་ཞིང་དོན་དེ་ལ་ལྟོས་པ་དག་ཀྱང་ཡོད། རྒྱུ་ཆད་དེ་ནམ་མཁའ་ལྟ་བུ་བྱང་ཆད་ཟེར་བ་ཡང་ཡོད་དོ།། བྱང་ཆད་དེ་རང་གི་ལུས་ཀྱང་སྟོང
190b6 ཟེར་བ་དག་ཀྱང་ཡོད་དོ།། རྒྱུ་ཡང་ཆད་འབྲས་བུ་ཡང་ཆད་པ་ནི། རྒྱུ་ཆད་དེ་སེམས་དངོས་པོར་བཟུང་བ་མེད། འབྲས་བུ་ཆད་དེ་ཕྱའམ་དབང་ཕྱུག་མེད་ཟེར་བ་དག་ཀྱང་ཡོད་དོ།། ཡང་ལམ་ཆད་དེ་སུན་མ་མེད། ཡེ
iiif viewer powered by OpenSeadragon
