| e-texts navigator |
| Wylie |
188b1 གཉིས་སུ་འདུས།། དེ་ཡང་དོན་མེད་ཕྱལ་བར་འདུས།། འཇིག་རྟེན་པ་ཡི་རྐང་གྲངས་སོ།། ཞེས་རིག་པ་རང་ཤར་ཆེན་པོའི་རྒྱུད་ལས།། འཇིག་རྟེན་པའི་ཐེག་པའི་གྲངས་བསྡུས་ཏེ་བསྟན་པའི་ལེའུ་སྟེ་ཉི་ཤུ་རྩ་ལྔ
188b2 པའོ།། །། དེ་ནས་གསང་བའི་བདག་པོས་འདི་སྐད་ཅེས་གསོལ་ཏོ།། ཀྱེ་ཀྱེ་བཅོམ་ལྡན་རྡོ་རྗེ་འཆང་།། འཇིག་ཚོགས་རྐང་གྲངས་དེ་ལྟར་ན།། དེ་རྣམས་བཤད་ལུགས་གསུང་དུ་གསོལ།། ཞེས་ཞུ་བ་ཞུས
188b3 སོ།། དེ་ནས་ཡང་བཅོམ་ལྡན་འདས་ཀྱིས་བཀའ་སྩལ་པ། ཨེ་མ་ཧོ་གསང་བའི་བདག་པོ་ཉོན་ཅིག། ངས་བསྟན་གྱིས་ལེགས་པར་ཉོན་ཅིག། གྲངས་ཅན་གྱི་ནི་འདོད་པ་འདི་ལྟ་སྟེ།། རྡུལ་དང་མུན་པ་སྙིང་སྟོབས
188b4 གསུམ།། རྟག་པ་ལོག་པར་འཛིན་པའོ།། དེ་ནས་ཀྱང་གཏི་མུག་གིས་གཞི་བྱེད་པར་འདོད།། འདོད་ཆགས་ཀྱིས་བདེ་བ་བསྐྱེད་པར་འདོད།། ཞེ་སྡང་གིས་དཔུང་བཟློག་པར་འདོད་པའོ།། དེ་ནི་གྲངས་ཅན་གྱི་འདོད
188b5 གཞུང་ངོ་།། བྱེ་བྲག་པའི་ལྟ་བ་འདི་ལྟ་སྟེ།། ཕྱིའི་ཕུང་པོ་ཁམས་དང་སྐྱེ་མཆེད་རྡུལ་ཕྲ་རབ་ཏུ་བལྟ། དེ་ཡང་དང་པོ་འཛིན་པས་བཟུང་ནས་རྡུལ་ཕྲ་རབ་ཏུ་བགྲང་སྟེ། འདི་ནི་འཇིག་པའི་རྒྱུ་ཅན་ནོ།། འདི་ནི་སྟོང་པའི
188b6 རྒྱུ་ཅན་ནོ།། འདི་ནི་སྟོང་པ་ཅི་ཡང་མེད་པའི་རྒྱུ་ཅན་ནོ།། ལུས་འདི་བོར་བ་དང་། སེམས་ནམ་མཁའི་བག་ལ་ཞ།། ལུས་ནི་འབྱུང་བའི་བག་ལ་ཞ།། ཅང་མེད་སྟོང་པའི་མུ་ལ་གནས་པའོ།། ཀུ་མཱ་རའི་གྲུབ་མཐའ་འདི
iiif viewer powered by OpenSeadragon
