| e-texts navigator |
| Wylie |
97b1 མཚོན་མེད་ངང་དུ་ཞོག། སྣང་སྲིད་ཁ་སྦྱོར་བདུད་རྩི་བཅུད་ཐིགས། འཁོར་བ་ཐོག་མཐའ་གཅོད་པའི་རྒྱུད་ལས། ཉམས་བླངས་དང་བཞག་བདུད་རྩིའི་ཉིང་ཁུའི་ལེའུ་སྟེ་དགུ་པའོ།། །། དེ་ནས་སེམས་ཉིད
97b2 ཀུན་བཟང་ལ།། རྡོ་རྗེ་སེམས་དཔས་འདི་སྐད་ཞུས།། མ་བཅོས་རྣལ་དུ་བཞག་པ་ཡི།། དེ་ཡི་བཞག་ཐབས་ཇི་ལྟར་ལགས།། བདག་ཅག་རྣམས་ལ་བསྟན་དུ་གསོལ།། ཞེས་གསོལ་པ་དང་། སྟོན་པ་ཀུན་ཏུ་བཟང་པོ
97b3 དེས།། རིན་པོ་ཆེ་འོད་འཕྲོ་འདུ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ནས་ཏིང་ངེ་འཛིན་ལས་བཞེངས་ནས།། ང་ཡིས་མ་བཅོས་གནས་བཞག་བསྟན།། རྡོ་རྗེ་སེམས་དཔས་གོ་བར་གྱིས།། ང་ལ་བལྟ
97b4 བར་འདོད་པ་རྣམས།། བལྟ་བར་མ་བྱེད་དེ་བཞིན་ཉིད་དུ་ཞོག། བལྟས་པས་མཐོང་བའི་ཡུལ་མེད་ཀྱིས།། མ་བལྟས་བཞག་པས་ལྟ་བ་ཉིད་དང་མཇལ།། ང་ལ་བསྒོམ་པར་འདོད་པ་རྣམས།། བསྒོམ་པར་མ་བྱེད་གཡོ
97b5 མེད་ངང་ལ་ཞོག། འགྱུ་མེད་ངང་ལ་བཞག་པས་སྒོམ་པ་ཉིད་དང་མཇལ།། ང་ལ་སྤྱོད་པར་འདོད་པ་རྣམས།། སྤྱད་པར་མ་བྱེད་བྱར་མེད་ངང་ལ་ཞོག། བྱར་མེད་ངང་ལ་བཞག་པས་སྤྱོད་པ་ཉིད་དང་མཇལ།། ང་ལ
97b6 བསྲུང་བར་འདོད་པ་རྣམས།། བསྲུང་བར་མ་བྱེད་མི་འདའི་ངང་ལ་ཞོག། འདའ་མེད་ངང་ལ་བཞག་པས་དམ་ཚིག་ཉིད་དང་མཇལ།། ང་ལ་བཙལ་བར་འདོད་པ་རྣམས།། བཙལ་བར་མ་བྱེད་རྩོལ་མེད་ངང་ལ
iiif viewer powered by OpenSeadragon
