| e-texts navigator |
| Wylie |
6b1 ཉོན།། བག་ཆགས་ཀུན་གཞིའི་རྟགས་ནི་ཕུང་པོ་ལྔ།། བག་ཆགས་རྒྱུ་མཐུན་རྣམ་པར་སྨིན་པ་སྟེ།། ཕུང་པོ་ལྔ་དང་དུས་གསུམ་མི་འབྲལ་ཕྱིར།། འཁྲུལ་པ་བརྟས་པའི་རྟགས་སུ་བསྟན་པ་ཡིན།། གཉེན་པོ་ཐུན་མོང་བ
6b2 དང་མ་ཡིན་གཉིས།། ཐུན་མོང་དད་པ་བརྩོན་འགྲུས་བཟོད་པ་དང་།། མོས་པས་དྲངས་པའི་ཏིང་འཛིན་ལ་སོགས་རྣམས།། ཐུན་མོང་མ་ཡིན་ཡེ་ཤེས་མ་རིག་དག། དབྱེ་བ་བག་ལ་ཉལ་དག་མངོན་གྱུར་གྱིས།། བསྐྱེད
6b3 པས་ངེས་པར་འགྲུབ་དང་གཞན་དུ་གྱུར།། གཞན་དུ་ལྟོས་དང་ངོ་བོས་འགྲུབ་པར་འདོད།། དབྱེ་བ་མ་ནོར་མི་འགལ་བསྟན་པ་ཡིན།། དེ་ཡང་འདུས་པའི་སྙིང་པོ་སེམས་དཔའ་ཉོན།། བག་ཆགས་རྩལ་ཀྱང་ཤས་ནི་ཆེ
6b4 ཆུང་སྟེ།། སྤྱི་ཡི་སྡུག་བསྔལ་སྐྱེ་རྒ་ན་འཆི་ཡིན།། བྱམས་བྲལ་དགྲ་ཕྲད་མེད་བཙལ་མི་རྙེད་པ།། གང་བྱུང་འཁོར་བའི་བག་ཆགས་རྩལ་དུ་གསུངས།། མིང་ནི་གྲངས་ལ་མང་དུ་ཡོད་མོད་ཀྱང་།། བག་ཆགས་ཉོན
6b5 མོངས་རྟོག་པ་སྐྱོན་དང་གསོག། སྒྲིབ་པ་ལྟུང་བ་གོལ་ས་འཁྲུལ་པ་སྟེ།། ཡུལ་ཡོད་བར་དུ་གྲངས་ལ་ཐུག་པ་མེད།། དེ་ཡང་རྡོ་རྗེ་སེམས་དཔའ་ཡང་ཉོན་ཅིག། དེ་དབྱེ་སྣང་བའི་འཁྲུལ་པ་ཡུལ་ལས་འབྱུང་།། དེ་ཕྱིར
6b6 ཡུལ་སེམས་བར་དུ་གོལ་ས་གཅད།། དེས་ཆོད་བག་ཆགས་གཞི་ལ་གོས་པ་མེད།། རྫོགས་པ་ཆེན་པོ་ལྟ་བ་ཡེ་ཤེས་གཏིང་ནས་རྫོགས་པའི་རྒྱུད་ལས། འཕྲལ་བྱུང་བག་ཆགས་ཀུན་གཞི་བསྟན་པའི་ལེའུ་སྟེ་དྲུག
iiif viewer powered by OpenSeadragon
