| e-texts navigator |
| Wylie |
58a1 དང་ཕྲད་པ་བཞིན།། ཐིག་ལེ་སྟོང་གསལ་ངོ་ཡིས་སྤྲད།། ཏིང་ངེ་འཛིན་གྱི་བར་དོ་ལ།། སྒེག་མོ་མེ་ལོང་ལྟ་བ་ལྟར།། རྟོགས་པའི་དོན་ལ་གནས་པར་བྱ།། རྨི་ལམ་དག་གི་བར་དོ་ལ།། བག་ཆགས
58a2 ཉིང་མཚམས་སྦྱོར་བ་ནི།། ཆུ་བོའི་གཞུང་ལྟར་ཤེས་པར་བྱ།། སྐྱེ་ཤི་དག་གི་བར་དོ་ལ།། ཡེ་ཤེས་ངོ་ཡིས་བཟུང་བ་ནི།། རྐང་ཆད་པ་ལ་ཝ་ནི་འཛུགས་པ་བཞིན།། ལུས་དང་སེམས་ནི་གཙུན་བྱས་ལ།། རབ་ནི་ཆོས་སྐུ
58a3 དག་ལ་འཕོ།། འབྲིང་ནི་གཟུགས་སྐུ་དག་པར་འཕོ།། ཐ་མ་ཞིང་ཁམས་དག་ཏུ་འཕོ།། དེ་ནས་ཡེ་ཤེས་རྒྱུན་ཉིད་དེ།། སྲིད་པ་དག་གི་བར་དོ་རུ།། མུན་པར་མར་མེ་བཏེག་པ་ལྟར།། ཐམས་ཅད་གསལ་བར་མངོན
58a4 ཤེས་འཆར།། ཡར་འགྲོ་མར་འགྲོ་ཐ་མལ་གསུམ།། རིག་པ་ཉིད་ལས་ལོག་ན་མེད།། ཞེས་གསུངས་སོ།། ལམ་གཏན་ལ་དབབ་པའི་ལེའུ་སྟེ་གཉིས་པའོ།། །། དེ་ནས་གཞན་ཡང་བཀའ་སྩལ་པ།། འབྲས
58a5 བུའི་རིམ་པ་འདི་ལྟར་འབྱུང་།། འབྲས་བུ་སངས་རྒྱས་ཉིད་ཡིན་ཏེ།། རིག་པ་ཉིད་ནི་སྐུ་དང་ཡེ་ཤེས་དག་ཏུ་སྣང་བ་སྟེ།། དེ་ཡང་རིག་པ་སེམས་ཉིད་ནི།། བདེ་བ་ཆེན་པོར་རབ་ཏུ་གནས་པའོ།། མ་རྟོགས་རིག་པ་འདི
58a6 ཉིད་རང་།། སྡུག་བསྔལ་དག་ཏུ་འགྱུར་བ་ཡིན།། གཞན་ནས་ཐོབ་པའི་གནས་མེད་དོ།། ཞེས་གསུངས་སོ།། འབྲས་བུ་གཏན་ལ་དབབ་པའི་ལེའུ་སྟེ་གསུམ་པའོ།། །། དེ་ནས་ཡང་དཔལ་ཀུན་ཏུ་བཟང་པོ་རྡོ།
iiif viewer powered by OpenSeadragon
