| e-texts navigator |
| Wylie |
290a1 ཀློང་ཡངས་མ་ཡི་དབྱིངས།། རྩལ་ཟེར་ཡན་ལག་བུ་རྣམས་དང་།། ཤེས་རབ་མཁའ་ལ་འདེགས་པ་དང་།། འབྱུང་བ་མ་ལ་ཞ་བ་དང་།། ཤེས་རབ་དབྱིངས་སུ་ཐིམ་པ་དང་།། ཡིན་ལ་མིན་པ་མེད་པ
290a2 དང་།། ཤེས་པ་མཁའ་ལ་འཁྱིལ་བ་དང་།། རིག་པ་རང་སར་གནས་པའོ།། ཐིམ་པ་ལ་ནི་མ་རྨུགས་དང་།། གསལ་ལ་རྟོག་པ་མེད་པ་དང་།། སོ་སོར་མ་འདྲེས་པ་ལ་མ་འབྱེད་པའོ།། དོན་གྲུབ་བསམ་པ་ཡོངས་སུ
290a3 གྲུབ།། ཐོལ་བྱུང་འཁྲུལ་ཆོད་ལོག་རྟོག་ཡིན།། ནམ་མཁར་རྟོག་པ་སྐྱེ་མེད་ཅིང་།། རྟོགས་པ་དེ་ཉིད་ནམ་མཁའ་འདྲ།། མི་ཆགས་ནམ་མཁའ་ལྟ་བུ་ལ།། རང་དོན་ཆེན་པོ་ནམ་མཁའ་འབྱུང་།། མཉམ་པས་རིམ་པས
290a4 བཀོད་པ་མེད།། གཅིག་པས་ཕྱོགས་བཅུ་དངོས་དང་བྲལ།། རང་བཞིན་གནས་པས་ལྷུན་གྱིས་གྲུབ།། གདོད་ནས་དག་པའི་སྙིང་པོ་ཡིན།། ལྷག་པའི་བསམ་པ་བཟུང་བ་མེད།། ཅེས་གསུངས་སོ།། ཉི་ཟླ་འབར་བའི
290a5 རྒྱུད་ལས། འཁྲུལ་པ་རྩད་བཅད་རྟོགས་ཐབས་འབྲས་བུ་བསྟན་པའི་ལེའུ་སྟེ་ལྔ་པའོ།། །། དེ་ནས་རྡོ་རྗེ་སེམས་དཔའ་ཡིས།། ཀུན་བཟང་ཉིད་ལ་འདི་སྐད་ཞུས།། གསང་སྔགས་དོན་གྱི་ངོ་བོ
290a6 གང་།། ཞེས་ཞུས་པ་དང་། དེ་ནས་སྟོན་པ་ཀུན་བཟང་དེ། འོད་བཀོལ་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་སོ།། དེ་ལས་བཞེངས་ནས་འདི་སྐད་གསུངས།། གསང་སྔགས་དོན་གྱི་ངོ་བོ་ནི།། གཟུང་འཛིན
iiif viewer powered by OpenSeadragon
