| e-texts navigator |
| Wylie |
255a1 རྫོགས།། བལྟ་བསྒོམ་སྤྱོད་འབྲས་འདུལ་ཁྲིམས་སྡོམ་པ་རྫོགས།། ཕ་རོལ་ཕྱིན་དྲུག་ལམ་ལྔ་ས་བཅུ་རྫོགས།། ཁྲུས་དང་གཙང་སྒྲ་མཚན་མ་ཡོད་མེད་རྫོགས།། དམ་རྫས་ཏན་གཎ་མ་བསྐྱེད་རྫོགས
255a2 ཚུལ་རྫོགས།། མེད་པ་ཕྱལ་པ་གཅིག་པུ་ལྷུན་གྲུབ་རྫོགས།། དགུ་རྩེ་སྤྱི་ཏིར་བརྒྱད་ཁྲི་བཞི་སྟོང་རྫོགས།། སྣང་སྲིད་འཁོར་འདས་འུབ་ཆུབ་རྫོགས།། རྫོགས་ལུགས་བསྟན་པའི་ལེའུ་སྟེ་བཅུ་གསུམ
255a3 པའོ།། །། དེ་ནས་གསལ་དག་རིན་ཆེན་གྱིས།། དངོས་མེད་ཀ་དག་ཀུན་བཟང་ལ།། ཐེག་པ་དགུ་རྩེ་སྤྱི་ཏི་ལ།། གོལ་སྒྲིབ་འཁྲུལ་པ་ཡོད་དམ་མེད།། ཅེས་ཞུས་པ་དང་། སྟོན་པས་འཁོར་ལ་བཀའ་སྩལ
255a4 པ།། སྤྱི་ཏི་ཡོ་ག་འདི་རྟོགས་ན།། གོལ་སྒྲིབ་འཁྲུལ་པ་གང་ཡང་མེད།། དངོས་མེད་ཀ་དག་རྣལ་མ་རྟོགས།། གོལ་སྒྲིབ་འཁྲུལ་པའི་མིང་ཡང་མེད།། མི་རྟོག་བློ་ལ་གོལ་སྒྲིབ་མེད།། ཅེས་གསུངས་སོ།། སྤྱི་ཏི་རྟོགས
255a5 ན་གོལ་སྒྲིབ་མེད་པར་བསྟན་པའི་ལེའུ་སྟེ་བཅུ་བཞི་པའོ།། །། དེ་ནས་ངང་དངས་ཀྱིས་ཞུས་པ།། གདམས་པའི་གནད་ནི་ཇི་ལྟར་ལགས།། ཞེས་ཞུས་པ་དང་། དངོས་མེད་སྟོན་པས་བཀའ་སྩལ་པ།། ཤེས་རིག
255a6 ཡིད་སེམས་དྲན་རྟོག་ཅན་གྱི་བློ།། གང་ལའང་འཛིན་མེད་འདི་ཡིན་ཏེ།། སྣང་སྲིད་གང་སྣང་དབྱེ་དང་བཙལ་མེད་པར།། རང་སར་གྲོལ་ན་གནད་ཡིན་ངེས་འཚལ་ལོ།། ཞེས་གསུངས་སོ།། སྒྲོན་མ་འབར་བའི་རྒྱུད
iiif viewer powered by OpenSeadragon
