| e-texts navigator |
| Wylie |
185a1 སྟོང་གཉིས་མེད་ཟུང་འཇུག་ལྟ་བར་འདོད།། མ་ཧཱ་ཡོ་གའི་ལྟ་བའི་འདོད་པ་སྟེ།། དབྱེ་བསལ་མེད་པའི་ཀློང་དུ་སྤྲོས་པ་ཆོད།། ཨ་ནུའི་ལྟ་བའི་འདོད་ལུགས་ནི།། སྙིང་པོའི་རང་བཞིན་རྒྱ་ཆད་མེད་པ
185a2 ལ།། ཕྱི་ཡི་ཡུལ་ནི་ཆོས་དབྱིངས་གཞལ་ཡས་ཁང་།། ནང་གི་བཅུད་ནི་ལྷ་ཡི་རང་བཞིན་ཡིན།། གཞལ་ཡས་ཁང་དང་ལྷ་ཡི་རང་བཞིན་དེ་གཉིས་ལ།། དབྱིངས་དང་ཡེ་ཤེས་གཉིས་མེད་ལྟ་བར་འདོད།། ཨ་ནུའི་ལྟ
185a3 བའི་འདོད་པ་དེ།། སོར་ཞག་ཆེན་པོའི་ཀློང་དུ་སྤྲོས་པ་ཆོད།། མ་ཧཱ་ཨ་ནུའི་ལྟ་བའི་སྤྲོས་པ་གཅོད་པའི་ལེའུ་སྟེ་བདུན་པའོ།། །། དེ་ནི་གཞན་གཞུང་སྤྲོས་པ་གཅད་པའོ།། དེ་ནས་འཁོར་གྱི་དམ་པ་རང་གསལ
185a4 ཁྱེའུ་ཆུང་གིས།། མཚོན་མེད་བརྗོད་ལས་འདས་པའི་སྟོན་པ་ལ།། གཞན་གཞུང་སྤྲོས་གཅོད་སྡེ་ལྔ་དེ་ལྟར་ན།། རང་གི་གཞུང་གི་འདོད་པའི་སྤྲོས་པ་གཅོད་པའི་སྡེ་ལྔ་ཇི་ལྟར་ལགས།། ཞེས་གསོལ་པ་དང་། མཚོན
185a5 མེད་བརྗོད་ལས་འདས་པའི་སྟོན་པ་ཡིས།། འཁོར་གྱི་དམ་པ་རང་གསལ་ཁྱེའུ་ཆུང་ལ།། སྙིང་པོའི་རང་བཞིན་ལྷུན་གྲུབ་ཆོས་སྐུ་ལ།། མཚན་ཉིད་མ་འགགས་སྣང་ཚུལ་ཅིར་ཡང་འཆར།། འཆར་བའི་ཟེར་ལས་སྐྱེ
185a6 བའི་རིག་པ་སྐྱེས།། སྐྱེས་ཀྱང་སྙིང་པོའི་དོན་ལས་གཡོས་པ་མེད།། མ་འདས་སྙིང་པོ་མ་བཅོས་ཆོས་སྐུ་ལ།། རང་བྱུང་རྩལ་གྱིས་རིག་པས་སོ་སོར་ཕྱེ།། ཕྱེ་བས་སྤྲོས་པ་གཅོད་པའི་སྡེ་ལྔ་པོ།། རང་གཞུང་ཉམས་སུ
iiif viewer powered by OpenSeadragon
