| e-texts navigator |
| Wylie |
179a1 ལས་འདས་པ་སྤྲོས་པ་ཆོད།། དོན་གྱི་སྤྲོས་གཅོད་རྣམ་ལྔར་གསུངས།། ཞེས་གསུངས་སོ།། རིན་པོ་ཆེ་བཅུད་ཀྱི་ཡང་སྙིང་རྩ་བའི་རྒྱུད་ལས། དོན་གྱི་སྤྲོས་གཅོད་བསྟན་པའི་ལེའུ་སྟེ་དགུ
179a2 པའོ།། །། དེ་ནས་སྟོན་པ་ཀུན་བཟང་ལ།། རྡོ་རྗེ་སེམས་དཔས་འདི་སྐད་གསོལ།། རྒྱུད་ཀྱི་མཚན་ནི་ཇི་ལྟར་བཟུང་།། མཚན་མིང་བཏགས་ཐབས་བཤད་དུ་གསོལ།། ཀུན་ཏུ་བཟང་པོས་འདི་སྐད
179a3 གསུངས།། དགོས་འདོད་མ་ལུས་འབྱུང་བའི་ཕྱིར།། རིན་པོ་ཆེ་ཡི་རྒྱུད་ཡིན་ནོ།། དུས་གསུམ་རྒྱལ་བའི་བཅུད་ཕྱུང་བས།། སེམས་ཉིད་བཅུད་ཀྱི་རྒྱུད་ཡིན་ནོ།། ཆོས་རྣམས་ཀུན་གྱི་ཡང་སྙིང་བསྡུས།། ཡང་སྙིང་ཉིད
179a4 ཁུའི་རྒྱུད་ཡིན་ནོ།། སྡེ་ལྔའི་རྩ་བ་གཅོད་པའི་ཕྱིར།། སྤྲོས་གཅོད་རྩ་བའི་རྒྱུད་དུ་ཟུང་།། ཞེས་གསུངས་སོ།། རིན་པོ་ཆེ་བཅུད་ཀྱི་ཡང་སྙིང་སྤྲོས་གཅོད་རྩ་བའི་རྒྱུད་ལས། རྒྱུད་ཀྱི་མཚན་བཏགས་པའི་ལེའུ་སྟེ་བཅུ
179a5 པའོ།། །། དེ་ནས་སྟོན་པ་ཀུན་བཟང་ལ།། རྡོ་རྗེ་སེམས་དཔས་འདི་སྐད་གསོལ།། རིན་ཆེན་བཅུད་ཀྱི་ཡང་སྙིང་མཆོག། སྤྲོས་གཅོད་རྩ་བའི་རྒྱུད་འདི་ནི།། གཏད་རྒྱ་གང་ཟག་གང་ལ་གཏད།། ཅེས་གསོལ་པ
179a6 དང་།། ཀུན་ཏུ་བཟང་པོས་འདི་སྐད་གསུངས།། དཔེར་ན་སེང་གེའི་འོ་མ་ཡང་།། སྣོད་ངན་ཕལ་དུ་བླུགས་གྱུར་ན།། སྣོད་ཀྱང་འཇིག་ལ་བཅུད་ཀྱང་འབོ།། དེ་བཞིན་ཡང་སྙིང་རྩ་རྒྱུད་ཀྱང་།། སྣོད་ངན་ཕལ་ལ་གཏད
iiif viewer powered by OpenSeadragon
