| e-texts navigator |
| Wylie |
190b1 རང་བྱུང་ཆོས་སྐུའི་གདེང་ལྡན་པས།། རྟོག་པ་དྲང་པོས་ཟིལ་གྱིས་མནན།། བདེ་བ་བོགས་འདོན་བདུད་བྱུང་ན།། རང་བྱུང་ཡེ་ཤེས་རྟེན་མེད་ཕྱིར།། དབང་ལ་མི་ལྟོས་འཕེལ་འགྲིབ་མེད།། རྐྱེན་ལས་མི་འབྱུང་ཟིལ
190b2 གྱིས་མནན།། གདེང་མེད་སྐུར་འདེབས་བདུད་བྱུང་ན།། ཆོས་སྐུར་སྒྲོ་སྐུར་བྲལ་བའི་ཕྱིར།། ལུང་ལྡན་ཅན་ལ་གནོད་མི་ནུས།། ལྟ་སྤྱོད་མཁན་གྱི་ཟིལ་གྱིས་མནན།། ང་རྒྱལ་སྒྲོ་འདོགས་བདུད་བྱུང་ན།། རང་བྱུང་དོན
190b3 ལ་སྒྲོ་འདོགས་བྲལ།། ངེས་པའི་གདམས་ངག་དམ་པ་འདི།། སྣོད་ངན་གསང་བས་ཟིལ་གྱིས་མནན།། ད་ཡང་འདུས་པའི་སྙིང་པོ་ཉོན།། དེ་དག་ཉམས་ཀྱི་བདུད་དྲུག་ཀྱང་།། རྟོགས་ན་རྣལ་འབྱོར་དམ་པའི་ལམ།།
190b4 དེ་ཕྱིར་བལྟ་བ་བརྗེད་མེད་བྱ།། དེ་དོན་སངས་རྒྱས་དགོངས་པ་ཡིན།། རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཉམས་ཀྱི་བདུད་ཟིལ་གྱིས་མནན་པར་བསྟན་པའི
190b5 ལེའུ་སྟེ་ཉེར་དྲུག་པའོ།། །། རྡོ་རྗེ་སེམས་དཔས་ཡང་ཞུས་པ།། སངས་རྒྱས་རྣམ་བཞི་ཇི་ལྟར་དབྱེ།། བར་དོར་སངས་ནི་ཇི་ལྟར་རྒྱ།། སངས་རྒྱས་མཛད་སྤྱོད་ཇི་ལྟར་འབྱུང་།། ཀུན་རིག་རྒྱལ་པོས་བཤད་དུ
190b6 གསོལ།། ཞུས་པའི་དོན་གསན་བཀའ་སྩལ་པ།། དང་པོ་རྒྱུ་ཡི་སངས་རྒྱས་ནི།། རང་བྱུང་ངོ་བོ་ཉིད་ཀྱི་སྐུ།། སེམས་ཅན་ཀུན་གཞིའི་མུན་གསེབ་ན།། རང་བྱུང་མ་རིག་སྒྲིབ་པ་སྟེ།། དེ་ཡི་གཏན་ཚིགས་ངེས་པ་ནི།།
iiif viewer powered by OpenSeadragon
