| e-texts navigator |
| Wylie |
169b1 བཤད་མ་ནོར་ཡོད་ཟེར་ནས།། ཞི་འབོལ་ཆགས་ཆུང་ཚུལ་འཆོས་ཏེ།། སྣོད་དང་ལྡན་ལ་བཤད་ཀྱི་ཟེར།། རང་ལ་ངེས་པའི་གདེང་མེད་པར།། མཁས་བཙུན་དག་ལ་ཁུངས་ཕྱུང་སྟེ།། ནོར་ཟས་དཔག་མེད་ངས་ཕུལ
169b2 ཟེར།། རྫུན་གྱི་དཔེ་ཆུང་བྲིས་ནས་བཀྲམ།། འབྱོར་ཚད་ཕུལ་ཅིག་ཟེར་ནས་བསླུས།། མཁས་པ་རྣམས་ནི་བསྐུར་མི་ཚུགས།། བླུན་པོས་བླུན་བསླུས་སྙིང་རེ་རྗེ།། ཁ་ཙམ་རྫུན་ཚིག་སྨྲས་ནས་ཀྱང་།། བསྟན་རྒྱུ
169b3 མེད་ཕྱིར་ཕྱིས་བསྟན་ཟེར།། རང་མེད་གདམས་ངག་གཞན་འཚོལ་འགྲོ།། མ་རྙེད་འཕྱར་ཀ་སྟོང་ཞིང་འཕྱ།། རྙེད་ན་བསྟན་གྱིས་ནོར་ཕུལ་ཟེར།། ཀུན་བསླུས་སུན་བཏོན་ཆོས་དང་བྲལ།། གཅིག་བསླུས་སེམས་ཅན
169b4 བརྒྱ་བསད་པས།། སྡིག་པ་ཤིན་ཏུ་ཆེ་བ་ཡིན།། དེ་ཕྱིར་རང་འདོད་ཆོས་མི་བཤད།། དེ་ཡང་འདུས་པའི་སྙིང་པོ་ཉོན། ལན་གཅིག་དུས་ཀྱི་དེང་སང་ན།། སྣོད་ལྡན་ཀུན་ལ་ཆོས་འདི་གསུངས།། དེ་ཚེ་ཐེག་དམན་སྒྲོ
169b5 སྐུར་འདེབས།། རང་གིས་རང་བསླུས་འཁོར་བར་ལྟུང་།། དེ་ཡང་འདུས་པའི་འཁོར་ཀུན་ཉོན།། འདི་ལ་སྨོན་ཅིང་འཛིན་པ་ལ།། སངས་རྒྱས་རྣམས་ཀྱི་བྱིན་གྱིས་རློབས།། རིག་འཛིན་རྣམས་ཀྱིས་ཐུགས་རྗེ་བསྐྱེད།།
169b6 མཁའ་འགྲོ་རྣམས་ཀྱིས་བར་ཆད་བསྲུངས།། བསོད་ནམས་མི་བཟད་གཏེར་དང་འཇལ།། ཕྱི་མའི་འབྲས་བུ་དུས་འདིར་སྨིན།། ཀུན་ཏུ་བཟང་པོས་དེ་སྐད་བཤད།། རྫོགས་པ་ཆེན་པོ་ངེས་དོན་ཐམས་ཅད་འདུས་པ།།
iiif viewer powered by OpenSeadragon
