| e-texts navigator |
| Wylie |
111a1 ཐིག་ལེ་བཀའ་སྩལ་པ།། འཁོར་འདས་མ་འགགས་ཆོས་སྐུ་ལ།། ཕྱི་ནང་རོལ་པ་ཅིར་སྣང་ཡང་།། མཐའ་དང་དབུས་མེད་ཡངས་པ་ལ།། ཀུན་ཏུ་བཟང་པོའི་ཐིག་ལེ་བྱ།། ད་ཡང་འདུས་པའི་སྙིང་པོ
111a2 ཉོན།། ངོ་བོ་ཉིད་ཀྱི་སྐུ་ཤེས་པས།། མི་ལེན་མི་སྤང་ཡེ་མཉམ་ཕྱིར།། རེ་དོགས་མེད་པས་རང་བྱུང་སྐུ།། དེ་ཕྱིར་ཀུན་བཟང་གདལ་བ་ལ།། གང་ཡང་མི་འགག་རོལ་པར་ཤར།། སྲོག་གཅོད་མ་བྱིན་ལེན་པ་དང་།། མི
111a3 ཚངས་སྤྱོད་དང་རྫུན་དུ་སྨྲ།། མཚམས་མེད་ལ་སོགས་སྡིག་བྱས་ཀྱང་།། ཉེས་པར་མི་འགྱུར་དཔལ་དུ་ཆེ།། སྟོང་གསུམ་མ་ལུས་ཚིག་གྱུར་ཀྱང་།། ནམ་མཁའ་མེ་ཆུས་མི་ཚུགས་འདྲ།། ད་ཡང་རྡོ་རྗེ་སེམས་དཔའ
111a4 ཉོན།། ཀུན་ནི་འཁོར་འདས་ཆོས་རྣམས་ལ།། བཟང་ནི་ཡེ་ཤེས་ཆོས་སྐུ་འཆར།། པོ་ནི་རོལ་པ་སྣ་ཚོགས་འབྱུང་།། ཐིག་ནི་རང་བྱུང་ཀུན་གྱི་གཞི།། ལེ་ནི་སེམས་ཅན་སངས་རྒྱས་གཞི།། དེ་ཕྱིར་ཀུན་བཟང་ཐིག་ལེ
111a5 བྱ།། རྫོགས་པ་ཆེན་པོ་ངེས་དོན་ཐམས་ཅད་འདུས་པ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་ཏུ་བཟང་པོའི་ཐིག་ལེ་བསྟན་པའི་ལེའུ་སྟེ། བརྒྱ་དང་ཉེར་བརྒྱད་པའོ།། །། དེ་ནས་འདུས་པའི
111a6 ཚོགས་རྣམས་ལ།། ཀུན་རིག་སྟོན་པ་ཆོས་རྗེ་ཡིས།། ལྷུན་གྲུབ་ཐིག་ལེ་བཀའ་སྩལ་པ།། ཡེ་ནས་གནས་པའི་ཆོས་ཉིད་ལ།། ལས་ཀྱི་རྒྱུ་འབྲས་གང་རུང་ཀུན།། རག་མ་ལུས་ཕྱིར་འདུས་མ་བྱས།། དེ་ཕྱིར་ཆོས་ཀྱི་སྙིང
iiif viewer powered by OpenSeadragon
