| e-texts navigator |
| Wylie |
90a1 མེད།། ང་ལ་བསྒྲུབ་པའི་ཐབས་མེད་པས།། དངོས་གྲུབ་གཞན་ནས་རེ་བ་མེད།། ང་ལ་བསྟན་པའི་ཚིག་མེད་པས།། རྟོག་པའི་སྒྲ་བསམ་ཡུལ་ལས་འདས།། ང་ལ་གོང་ན་རྗེ་མེད་པས།། ཡེ་ཤེས་ཀུན
90a2 ལས་ཁྱད་པར་འཕགས།། ང་ལ་འོག་ན་འབངས་མེད་ཕྱིར།། སྙིང་རྗེ་ཆེན་པོ་སྤྱིར་མི་མཛད།། ང་ཉིད་ཡེ་ཤེས་རང་བཞིན་ལ།། ཐབས་ཀྱི་ངོ་བོ་དབྱིངས་ན་གསལ།། ཉི་མའི་སྙིང་པོ་རང་ཤར་བས།། འབྱུང་བ་ལྔ་ལ
90a3 ཁྱབ་པ་བཞིན།། ཆོས་སྐུ་རིག་པ་དངོས་མེད་ལ།། བཙལ་བ་མེད་པར་ཡེ་གནས་ཕྱིར།། ནམ་མཁའ་ལྟ་བུར་རང་གསལ་བས།། བག་ཆགས་སྐྱོན་གྱིས་བསྒྱུར་དུ་མེད།། རིན་ཆེན་ལྟ་བུའི་ཡོན་ཏན་ལ།། ཆོས་སྐུའི
90a4 གཟུགས་བརྙན་གཟུགས་སྐུ་འབྱུང་།། ཕྱི་ནང་མེད་པར་ཡེ་ཤེས་སྐུ།། སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། ལྷ
90a5 དབང་གི་ཐེ་ཚོམ་གྱི་གེགས་བསལ་བའི་ལེའུ་སྟེ་ང་བདུན་པའོ།། །། དེ་ནས་འདུས་པའི་ཚོགས་རྣམས་ལ།། ཀུན་རིག་རྒྱལ་པོས་བཀའ་སྩལ་པ།། ལུང་ལྡན་ངེས་པའི་རྒྱུད་ཆེན་འདི།། དད་ལྡན་ཀུན་ལ་འདི་ཡོད
90a6 ན།། རྣམ་སྨིན་ལུས་དང་མ་བྲལ་བར།། སངས་རྒྱས་ད་ལྟ་དགོངས་པ་ཉིད།། གཞི་དང་ཤེས་པ་གཅིག་ཏུ་རྟོགས།། འཁྲུལ་པ་མེད་པར་རང་ཡིད་ཆེས།། འདུ་ཤེས་བསྐུམ་དང་རྒྱ་བསྐྱེད་མེད།། གང་ལྟར་གནས་པ་ཆོས
iiif viewer powered by OpenSeadragon
