| e-texts navigator |
| Wylie |
84b1 ཀྱི་རྩོལ་བ་ཡིས།། སྤང་སྦྱང་བསྒྱུར་འཇིག་ལ་སོགས་པ།། ཐབས་མང་དཀའ་བ་སྣ་ཚོགས་ཀྱིས།། གཉེན་པོ་བསྐྱེད་དང་རྫོགས་པ་ཡིས།། ལྷག་པར་ཏིང་འཛིན་ཅི་བསྒོམས་ཀྱང་།། ཡུལ་དང་འབྲེལ་བ་མ
84b2 ཆོད་ཕྱིར།། རྟགས་དང་ཉམས་ནི་ཅི་བྱུང་ཡང་།། བེམ་རིག་ཤན་འདི་མ་ཕྱེད་ན།། ཉམས་མྱོང་བཟང་ཡང་འཁྲུལ་པ་ཡིན།། དེ་ཕྱིར་ཡུལ་སེམས་གཅིག་ཟེར་པ།། དེ་ལྟར་མཁས་ཀྱང་སངས་མི་རྒྱ།། དེ་ཡང་འདུས་པའི
84b3 སྙིང་པོ་ཉོན།། དེ་དག་གཞི་དེ་རྟོགས་པ་དང་།། མ་རྟོགས་རྒྱུད་པ་མཆོད་ཀྱང་།། འཁྲུལ་དང་མ་འཁྲུལ་ཕྱེ་བ་ལས།། དོན་ལ་རྒྱུད་ལུང་ཆོས་མི་དགོས།། སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ
84b4 འདུས་པར་བཀའ་བགྲོས་པའི་དོན། རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས། མ་བསྒོམས་གོལ་ས་མེད་པར་བསྟན་པའི་ལེའུ་སྟེ་ཞེ་དགུ་པའོ།། །། དེ་ནས་འདུས་པའི་ཚོགས་རྣམས་ལ།། གནས་ལུགས
84b5 ཉམས་ནི་བཀའ་སྩལ་པ།། ཆོས་རྣམས་ཀུན་གྱི་རྩ་བ་ནི།། རང་བྱུང་ཡེ་ཤེས་རྟོགས་པའི་དོན།། ད་ལྟ་ཉིད་དུ་ཉམས་སུ་མྱོང་།། བདེ་ལྡན་སངས་རྒྱས་ཀུན་དང་མཉམ།། དེ་ཡང་རྡོ་རྗེ་སེམས་དཔའ་ཉོན།། ཡེ་ནས
84b6 གནས་པར་དོན་གོ་བས།། སྒྲིབ་སྐྱོང་ཚོགས་བསགས་བྱ་མི་དགོས།། རང་བཞིན་གཞི་ཡི་གནས་ལུགས་ལ།། བྱར་མེད་བསྒྲུབ་མེད་དོན་ཤེས་པས།། བསྙེན་བསྒྲུབ་ཆོས་ལ་རྩོལ་མི་དགོས།། གཞན་ནས་མི་འབྱུང་རང
iiif viewer powered by OpenSeadragon
