| e-texts navigator |
| Wylie |
180a1 ཐུགས།། ཡེ་ཤེས་རང་ཤར་དོན་རྟོགས་པས།། རང་བྱུང་ཆོས་སྐུ་ཁ་མིག་ཅན། ཡེ་ཤེས་སྒོ་ལྔ་གསལ་བར་འདུས།། ཐེག་གཞན་སངས་རྒྱས་འདོད་པ་དེ།། བློས་བྱས་རྣམ་གསུམ་ངེས་དོན་མེད།། དེ་ཕྱིར
180a2 ཡང་ཏི་སངས་རྒྱས་ཀྱི།། འབྲས་བུ་བར་དོར་སངས་རྒྱས་སྨྲ།། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། ངེས་དོན་གྱི་སངས་རྒྱས་བསྟན་པའི་ལེའུ་སྟེ་སོ་དྲུག་པའོ།། །། དེ་ནས་སྟོན་པ་ཀུན་བཟང་གིས།།
180a3 འདུས་པའི་འཁོར་ལ་དོན་གཏད་པ།། ངེས་དོན་འདུས་པའི་ཡང་སྙིང་འདི།། སངས་རྒྱས་ཀུན་གྱིས་གསུངས་པའི་ཆོས།། རིག་འཛིན་རྣམས་ཀྱིས་ཐུགས་ལ་སྦས།། ཆོས་སྐྱོང་ཀུན་གྱིས་གཏེར་ལྟར་བསྲུང་།། མཁའ
180a4 འགྲོ་རྣམས་ཀྱིས་མིག་ལྟར་འཚོ།། དེ་ཕྱིར་རྒྱུད་འདི་ཤིན་ཏུ་གཉེན།། དེ་དོན་མན་ངག་ངེས་དོན་འདི།། ལོག་སྲེད་ཆགས་ཞེན་མ་ངེས་ལ།། ནམ་ཡང་བསྟན་པར་མ་གསུངས་སོ།། དེ་ཡང་རྡོ་རྗེ་སེམས་དཔའ་ཉོན།།
180a5 ཡང་དག་ངེས་དོན་ཁྱད་པར་ཅན།། འབྲས་བུ་མངོན་འབྱུང་ངེས་པ་འདི།། སྣོད་ངན་རྣམས་ལ་མ་གསང་ན།། ཚེ་ཐུང་སྡུག་བསྔལ་ནད་འབྱུང་ཞིང་།། ཕྱི་མ་ཐར་མེད་དམྱལ་བར་ལྟུང་།། དེ་ཕྱིར་མི་བསྟན་སྣོད་ངན་ནི།།
180a6 བླ་མར་མི་གུས་ང་རྒྱལ་ཅན།། ཚུལ་འཆོས་བྱེད་ཅིང་སློབ་དཔོན་སྨོད།། དབུལ་བ་མེད་པར་གདམས་ངག་འདོད།། བཀའ་རྐུན་བྱས་ནས་ཡོད་ཚུལ་སྟོན།། དོན་མ་གོ་བས་ཆོས་ལ་སྡང་།། དཔེ་རྐུན་བྱས་པས་ཕྱི་ཐག
iiif viewer powered by OpenSeadragon
