| e-texts navigator |
| Wylie |
112b1 སྦྱངས་སྒྲིབ་དག་ང་ཡིས་བསྟན།། མ་བསྒྲུབས་སངས་རྒྱས་ད་ལྟ་བྱ།། མ་བསགས་ཚོགས་གཉིས་ངས་འདིར་རྫོགས།། མ་བསྒོམས་སངས་རྒྱས་ང་ཡི་ཆོས།། མ་བཙལ་ལྷུན་གྱིས་གྲུབ་པ་ཡིན།། རྫོགས་ཆེན་རྟོགས
112b2 པའི་རྣལ་འབྱོར་པས།། ཉེས་པ་བྱས་ཀྱང་དཔལ་དུ་ཆེ།། དེ་དོན་ངེས་པར་ངས་བཤད་ཀྱི།། བློ་དམན་ཀུན་ཀྱང་གཟེངས་བསྟོད་ཅིག། ཐོས་བསམ་མི་དགོས་བསྟན་པས་ཆོག། གོམས་པ་མི་དགོས་ཤེས་པས་ཆོག།
112b3 རྣམ་སྨིན་ལུས་དང་མ་བྲལ་བར།། སངས་རྒྱས་ཀུན་དང་མཉམ་པར་བྱ།། དེ་ཡང་རྡོ་རྗེ་སེམས་དཔའ་ཉོན།། དེ་ཤེས་ཡོན་ཏན་ཆེན་པོ་ནི།། ནམ་མཁའ་དབྱིངས་དང་འདྲ་བ་སྟེ།། དཔག་ཅིང་གཞལ་བའི་སེམས་ལས
112b4 འདས།། ཐེག་པའི་སྒོ་མོ་བརྗོད་ལས་འདས།། སྡེ་སྣོད་ཆོས་རྣམས་བཤད་མི་ལངས།། སྡེ་སྣོད་ཉིད་ཀྱང་བཏགས་པ་ཙམ།། དེ་ལྟར་དབྱེ་བ་བསམ་ཡས་ཀྱང་།། དོན་གྱི་ངོ་བོ་གཅིག་ལས་མེད།། དེ་དོན་གསལ་བར
112b5 ངས་བཤད་ཀྱིས།། ལེགས་པར་ཉོན་ལ་ཡིད་ལ་ཟུངས།། དེ་སྐད་གསུངས་པའི་དོན་གོ་ནས།། འཁོར་རྣམས་དགའ་མགུ་ཡི་རང་སྟེ།། ཡང་དག་གུས་པའི་ཚུལ་གྱིས་ནི།། མ་ནོར་བདེན་པའི་ཆོས་མཉན་ཏོ།། རྫོགས་པ
112b6 ཆེན་པོ་དོན་འདུས་རང་བྱུང་བདེ་བའི་འཁོར་ལོའི་རྒྱུད་ལས། འཁོར་རྣམས་ལ་གཟེངས་བསྟོད་པ་བསྟན་པའི་ལེའུ་སྟེ་བཅུ་གསུམ་པའོ།། །། དེ་ནས་ཀུན་རིག་སྟོན་པ་དེས།། ངེས་དོན་རྩ་བ་འདི་གསུངས་པ།
iiif viewer powered by OpenSeadragon
