| e-texts navigator |
| Wylie |
102b1 དཔེར་ན་མེ་ལོང་གཡའ་བཞིན་དུ།། ཤེས་པ་ཆོས་སྐུ་ཉག་གཅིག་ལ།། གང་གི་རང་བློ་མ་ཞུགས་པ།། གཏི་མུག་མུན་པར་འཐིབས་པ་སྟེ།། ས་ཞག་ཆུ་འདྲས་རྙོག་མ་བཞིན།། སྤྱད་པས་མ་ཤེས་མ་རིག་རྒྱུ།། ཀུན་ཏུ
102b2 བརྟགས་པའི་རྟོག་པ་རྣམས།། རྐྱེན་གྱིས་ལོག་པར་བལྟ་བ་སྟེ།། ཕྲ་རགས་ཚུལ་ལས་ཀུན་གཞི་འབྱུང་།། སྔ་མའི་རྟོག་པ་བག་ཙམ་ལ།། ཕྱི་མའི་ཉོན་མོངས་རྒྱུན་ཆགས་པས།། ཀུན་གཞི་ལ་བསགས་བག་ཆགས
102b3 བྱུང་།། དེ་ལྟས་དུག་ལྔ་ཉོན་མོངས་བསྐྱེད།། རང་གར་སྤྱོད་པས་འགྲོ་དྲུག་གི།། བཟང་ངན་བདེ་སྡུག་སྣ་ཚོགས་བྱུང་།། ལུས་ངན་བླངས་པས་ཐར་པ་མེད།། ཁམས་གསུམ་སྡུག་བསྔལ་གདོས་ཐག་ཅན།། མཐའ་ཡས
102b4 སེམས་ཅན་བགྲང་མི་ལང་།། འཁོར་བ་ཞེས་ནི་དེ་ལ་བྱ།། རྫོགས་པ་ཆེན་པོ་དོན་འདུས་རང་འབྱུང་བདེ་བའི་འཁོར་ལོའི་རྒྱུད་ལས། མ་རྟོགས་འཁོར་བའི་བྱུང་ཚུལ་བསྟན་པའི་ལེའུ་སྟེ་གསུམ་པའོ།། །། དེ
102b5 ནས་མ་རྟོགས་འཆིང་བ་ཡི།། སྐྱོན་གྱི་རྩ་བ་བཀའ་སྩལ་པ།། འཁྲུལ་པ་མ་ལོག་སེམས་ཅན་རྣམས།། བདུད་རྩིའི་འཚོ་བའི་སྨན་ཡོད་ཀྱང་།། མ་ཕན་དུག་གི་ནད་ཀྱིས་གཟིར།། སྒྲོན་མེའི་ཡེ་ཤེས་གསལ་ཡོད་ཀྱང་།།
102b6 མ་རིག་མུན་པའི་འཁོར་བར་འཁྱམས།། དགོས་དགུའི་ཡོན་ཏན་ཡོད་གྱུར་ཀྱང་།། ཟས་ནོར་འཚོ་བས་རྟག་ཏུ་མནར།། གོང་དུ་འདྲེན་པའི་ལམ་ཡོད་ཀྱང་།། ཐར་མེད་འཁོར་བའི་དོང་དུ་ཞུགས།། ཡེ་ཤེས་བདེ་བའི
iiif viewer powered by OpenSeadragon
