| e-texts navigator |
| Wylie |
68b1 མཐའ་རྣམས་ཀུན་དང་བྲལ།། བློ་འདས་ཡིད་ཀྱི་ཡུལ་ལས་འདས།། ལུས་ཀྱིས་བྱས་ཤིང་ངག་གིས་སྨྲས་པ་དང་།། བློ་ཡིས་བསམས་ཤིང་ཡིད་ཀྱིས་མནོ་ལས་འདས།། རང་རིག་ཆོས་སྐུ་བྱ་བ་ཡང་།། བཏགས་པ་ཙམ
68b2 ལས་དོན་ལ་འདི་འདྲ་མེད།། སྐུ་གསུམ་ཡེ་ཤེས་ལྔ་སོགས་ཀྱང་།། མཚོན་པ་ཙམ་དུ་བསྟན་པ་ཡིན།། བྱང་ཆུབ་བསྒྲུབ་བྱ་བསྒྲུབ་ཏུ་མེད།། དེ་དག་རང་གི་ངོ་བོ་སྟེ།། རིག་པ་ཆོས་སྐུ་ཙམ་དུ་བཏགས།། ལྟ་བ་ལ་ཟློ་དེ
68b3 བཞིན་ཡིན།། གདེངས་ཆེན་དེ་ལ་ཡིད་ཆེས་གྱིས།། བརྗོད་མེད་བསམ་མེད་མཐའ་བྲལ་དེ།། ཡེ་ནས་གནས་པའི་ཆ་ནས་གཞི།། དེ་མ་རྟོགས་ལས་འཁྲུལ་པ་བྱུང་།། དེ་རྟོགས་མཚོན་དཔེ་ངོ་སྤྲོད་ཡིན།། ཇི་ལྟར་གཞི
68b4 མཐོང་ལྟ་བ་ཡིན།། མཐོང་དོན་གསལ་བས་བསྒོམ་པ་ཡིན།། དེ་ཉིད་དུས་གསུམ་རྒྱུན་ཁྱེར་བ།། སྤྱོད་པ་ཙམ་དུ་བཏགས་པ་ཡིན།། མངོན་གྱུར་འབྲས་བུ་ཞེས་སུ་བསྟན།། ལྟ་བ་ལམ་འཁྱེར་དུས་སུ་ནི།། ངོ་བོ་རྩལ
68b5 དང་བཅས་པ་གསུམ།། ཕྱི་ཡི་ཡུལ་རྐྱེན་འབྱུང་བའི་ཆ།། དོན་ལ་གྲུབ་པ་མེད་པས་ན།། རང་སྣང་རང་གྲོལ་དངོས་མེད་ཡིན།། ཡུལ་གྱིས་དོན་ལ་གནོད་མི་ནུས།། གདེངས་ཆེན་ལ་ཟློ་དེ་བཞིན་ནོ།། ཞེས་གསུངས
68b6 སོ།། སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ལྟ་བ་ལ་བཟླ་བའི་ལེའུ་སྟེ་ང་བདུན་པའོ།། །། དེ་ནས་ཡང་གསང་བའི་བདག་པོས་ཞུས་པ། ཀྱེ་ཀྱེ་བཅོམ་ལྡན་རྡོ་རྗེ་འཆང་།། བསྒོམ་དུ་ཡོད་མེད་ཇི་ལྟར
iiif viewer powered by OpenSeadragon
