| e-texts navigator |
| Wylie |
60a1 ཡིན།། དེ་ཉིད་གཉིས་སུ་མེད་པར་མཉམ་པ་ཡིས།། གཉིས་མེད་མཉམ་པ་ཉིད་ཀྱི་ཡེ་ཤེས་ཡིན།། དེ་རྣམས་མ་འགགས་སོ་སོར་གསལ་བ་ཡིས།། སོ་སོར་རྟོགས་པའི་ཡེ་ཤེས་ཞེས་བྱའོ།། དེ་ལྟ་བུ་ཡི་ཡེ
60a2 ཤེས་དེ་རྩལ་གྱིས།། གསལ་བ་མ་འགགས་གང་ཡང་གྲུབ་པས་ན།། བྱ་བ་གྲུབ་པའི་ཡེ་ཤེས་ཞེས་སུ་བསྟན།། དེ་ལས་གསལ་རྩལ་འོད་ལྔ་ཤར་བས་ན།། མཚན་ཉིད་འཛིན་པའི་ཡེ་ཤེས་ལྔ་ཞེས་བྱ།། ལྟ་བའི་དབྱེ་བ
60a3 རྣམ་པ་གསུམ་དུ་བསྟན།། རང་གི་རིག་པ་ཆོས་སྐུར་བསྟན་པ་དང་།། བར་གྱི་རིག་རྩལ་མ་འགག་བསྟན་པ་དང་།། ཕྱི་ཡི་སྣང་བ་ཆོས་དབྱིངས་བསྟན་པའོ།། ནང་གི་རིག་པ་རྟོགས་ན་ཆོས་ཀྱི་སྐུ།། རྩལ་ནི་གཟུགས་སྐུ
60a4 གཉིས་སུ་སྣང་བའོ།། ཆོས་སྐུ་ཕྱེ་ན་ཡེ་ཤེས་ལྔ་རུ་བསྟན།། དེ་ཡི་རྩལ་ནི་ཁ་དོག་འོད་ལྔར་ཤར།། ནང་གི་འགྱུ་བ་སྒོ་ལྔར་བཅས་པ་ཡིན།། ཕྱི་ཡི་ཡུལ་ལ་སྤྱོད་ཀྱང་རང་སར་གྲོལ།། འཛིན་རྟོག་མེད་པས་འགྱུ་བ
60a5 ཟང་ཐལ་ཡིན།། ཕྱི་ཡི་རང་བྱུང་རིག་པ་གསལ་གྱུར་ན།། ཕྱི་ཡི་ཡུལ་ནི་ཆོས་དབྱིངས་སྟོང་པ་ལ།། འོད་ལྔ་ཤར་བས་འབྱུང་བ་ལྔ་རུ་བརྟས།། བར་གྱི་གདངས་ནི་རང་རང་ལུས་སུ་གྲུབ།། མ་རིག་ལས་བྱུང་ཉོན་མོངས
60a6 དུག་ལྔ་ནི།། རང་རིག་རང་གསལ་འཛིན་མེད་ངོ་ཤེས་ན།། རང་ཆས་ཤར་བས་རང་སྣང་དག་ཏུ་བསྟན།། འཛིན་པ་འགྱུས་ཀྱང་གར་འགྱུས་རང་སར་གྲོལ།། ཕྱི་ཡི་སྣང་བ་ཡུལ་ལ་མ་ཞེན་ཅིང་།། ནང་གི་རང་བྱུང་རིག
iiif viewer powered by OpenSeadragon
