| e-texts navigator |
| Wylie |
33a1 གསུངས་སོ།། སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། སྤྲུལ་པའི་སྐུ་ཇི་ལྟར་འཇིག་རྟེན་དུ་བྱུང་ཚུལ་བསྟན་པའི་ལེའུ་སྟེ་སོ་གསུམ་པའོ།། །། དེ་ནས་ཡང་གསང་བའི་བདག་པོས་ཞུས་པ། ཀྱེ
33a2 ཀྱེཀྱི་སྟོན་པ་རྡོ་རྗེ་འཆང་།། སྐུ་གསུམ་གྱི་དོན་བཤད་གསུང་དུ་གསོལ།། ཞེས་ཞུས་སོ།། སྟོན་པས་བཀའ་སྩལ་པ། ཆོས་སྐུའི་ངོ་བོ་ནི་ཕྱོགས་ལྷུང་མེད་པའི་ཤེས་རབ་དང་གཉིས་སུ་མེད་པའོ།། ལོངས་སྐུའི་ངོ་བོ་ནི།
33a3 མཚན་ཉིད་འཛིན་པའི་ཡེ་ཤེས་གསལ་བ་ལ་མི་རྟོག་པའོ།། སྤྲུལ་པའི་སྐུའི་ངོ་བོ་ནི། ཐུགས་རྗེ་མ་འགགས་པའོ།། ཆོས་སྐུའི་ངེས་ཚིག་ནི་ཁྱབ་པ་དང་རྟེན་བྱེད་པའོ།། ལོངས་སྐུའི་ངེས་ཚིག་ནི། ཞིང་དག་པ་དང
33a4 འཁོར་སྨིན་པ་དང་ལོངས་སྤྱོད་པའོ།། སྦྲུལ་སྐུའི་ངེས་ཚིག་ནི་མ་འགགས་པའི་ཐུགས་རྗེ་སྣ་ཚོགས་པར་སྤྲུལ་པའི་ཕྱིར་སྦྲུལ་སྐུའོ།། ཡུན་ཐུང་བའི་ཕྱིར་སྦྲུལ་སྐུའོ།། མཐུན་པར་སྣང་བའི་ཕྱིར་སྦྲུལ་སྐུའོ།། མ་ངེས་པར
33a5 སྣང་བའི་ཕྱིར་ན་སྦྲུལ་སྐུའོ།། ཆོས་སྐུ་ལ་དབྱེ་ན་གསུམ་སྟེ། རིག་པ་ངོས་བཟུང་བྲལ་ཞིང་མི་འགྱུར་བས། ཆོས་སྐུའི་ཆོས་སྐུའོ།། རིག་པ་ཤེས་རབ་ཀྱིས་སྐུ་ལ་མཁྱེན་པ་མ་འགགས་པས་ཆོས་སྐུའི་ལོངས
33a6 སྐུའོ།། གདུལ་བྱ་ལ་སྣང་བའི་སྐུ་ལྔ་ནི། ཆོས་སྐུའི་སྦྲུལ་སྐུའོ།། རིགས་ཀྱི་བུ་དེ་ལ་ནི་ངོ་བོ་རང་བཞིན་ཐུགས་རྗེ་གསུམ་ཞེས་ཀྱང་བྱའོ།། གཞི་ལ་གནས་པའི་སྐུ་གསུམ་ཞེས་ཀྱང་བྱའོ།། འབྲས་བུ་གཞི་ལ་གྲུབ་པ་ཞེས
iiif viewer powered by OpenSeadragon
