| e-texts navigator |
| Wylie |
248a1 ཟེར་དམར་པོ་འཕྲོས།། ཨ་ལས་འོད་འཕྲོས་དམར་པོ་གཙོ།། མཆོད་སྦྱངས་དྲེགས་པ་དབང་དུ་བསྡུས།། དབང་བསྡུའི་ཏིང་འཛིན་ང་རྒྱལ་ལྡན།། སོ་སོའི་དོན་རྟོགས་གཅིག་ཏུ་གྱུར།། འདི་ཡི་དོན
248a2 རྟོགས་གཅིག་ཀྱང་མེད།། ཤེས་པས་རང་བྱུང་ཡུལ་མེད་རང་།། སོ་སོར་མ་རིག་གཅིག་པུ་རང་།། ཡུལ་མེད་མིང་བྲལ་ཡེ་ཤེས་ཉིད།། གཅིག་ནི་ཀུན་གྱི་རང་བཞིན་ཡིན།། མ་འདྲེས་རྒྱ་མཚོའི་གཟའ་སྐར
248a3 འདྲ།། ཞེས་གསུངས་སོ།། བཛྲ་བརྒྱ་པའི་རྒྱུད་ལས་གསུང་གི་ལེའུ་སྟེ་དགུ་པའོ།། །། དེ་ནས་ཡང་བཀའ་སྩལ་པ།། ཉོན་ཅིག་རྡོ་རྗེ་རིགས་ཀྱི་འཁོར།། རྡོ་རྗེ་ཀརྨ་ལས་ཀྱི་སྐུ།། དོན་ཡོད་གྲུབ་པ་དྲག་པོའི
248a4 ལྷ།། མངོན་པར་བྱང་ཆུབ་བྱ་བ་གྲུབ།། ཕྲིན་ལས་བརྒྱ་པ་ངན་སྔགས་བརྒྱ།། ཁོང་ཁྲོ་ཕྲག་དོག་བཤགས་ཚངས་བྱེད།། བདུད་དང་བར་གཅོད་དགྲ་དང་བགེགས།། དགེ་ལ་བར་གཅོད་གང་བྱེད་ཀུན།། བསད་མནན
248a5 བསྲེག་དང་བསྐྲད་དང་བཟློག། དྲག་པོའི་ལས་རྣམས་ཐམས་ཅད་འགྲུབ།། སྦྱོར་བ་དངོས་གཞིའི་རྗེས་གསུམ་སྟེ།། སྙིང་རྗེས་བསྒྲལ་བའི་དམ་ཚིག་ནི།། སྦྱོར་བའི་དོན་ལ་ཟིན་པར་བྱ།། ང་རྒྱལ་ཁྲོ་མཆོག་སྐུ
248a6 གསུང་ཐུགས།། སེང་གེའི་ཡིད་ལ་འབྲུག་གི་སྐད།། ཁྲོ་བོའི་ལུས་ལ་མཚོན་ཆའི་ཐོག། དངོས་གཞི་དོན་ལ་ཤེས་པའི་གདེངས།། སྤྲོ་བསྡུས་མཆོད་སྦྱངས་དྲེགས་པ་འདུལ།། ཏིང་འཛིན་གློག་དང་འབྲུག་ལྟར
iiif viewer powered by OpenSeadragon
