| e-texts navigator |
| Wylie |
23b1 ལུང་དུ།། གང་བྱུང་དེ་བཞིན་ཤེས་པར་གྱིས།། ཞེས་གསུངས་སོ།། སྤྲོས་བྲལ་དོན་གསལ་གྱི་རྒྱུད་ཆེན་པོ་བཤད་པའི་རྒྱུད་བཀླགས་པས་ཤེས་པ་ལས། འཁྲུལ་པའི་རྐྱེན་དང་བར་གྱི་བསྐལ་པ་ལ་ཡུལ་གྱི་འཁྲུལ་པ
23b2 ལུས་ཀྱི་རྐྱེན་དང་བཅས་པ་བསྟན་པའི་ལེའུ་སྟེ་བཅུ་དགུ་པའོ།། །། དེ་ནས་ཡང་གསང་བའི་བདག་པོས་ཞུས་པ། སྣོད་ཀྱི་འཇིག་རྟེན་དེ་ལྟར་ན། བཅུད་ཀྱི་རིགས་དྲུག་ཇི་ལྟར་ཆགས། ཞེས་ཞུས་སོ།། སྟོན
23b3 པས་བཀའ་སྩལ་པ། རིགས་ཀྱི་བུ་ངས་བསྟན་གྱི་མ་ནོར་བར་ཟུང་ཞིག། ནམ་མཁའ་སྟོང་པ་ལ་ནི་རླུང་འགྱུ་བཞིན།། ཡིད་ཀྱི་རླུང་ཡང་གླང་ཆེན་ཀུན་ཏུ་རྒྱུག། སྤྱན་གྱི་སྦྱོར་བས་སྲིད་པའི་སྒོ་ང་མཐོང་།། ཐུགས་ཀྱི
23b4 སྦྱོར་བས་སྲིད་པའི་སྒོ་ང་ལེགས་ཤིང་མཛེས་པར་མཁྱེན།། ཞལ་གྱི་སྦྱོར་བས་དེ་ལ་ཆགས་སེམས་སྐྱེས།། རིག་པ་ཡིད་དང་བཅས་པ་ཞུགས།། སེམས་ཀྱི་རྩ་བ་ཕོ་མོ་གཉིས་སུ་སྨིན།། སྐྱེ་བ་བཞི་ལས་སྒོ་ང
23b5 ཡིན།། གཞི་ལ་ཆེན་པོ་ལྔ་ཡིས་ཕུང་པོ་ལྔ་གྲུབ་ཅིང་།། རྟེན་ལས་འབྱུང་བ་ལྔ་ཡི་ཆ་རྫོགས་པས།། ཕུང་པོ་ཁམས་དང་སྐྱེ་མཆེད་གྲུབ།། ཤེད་བུ་ཤེད་ལས་རབ་ཏུ་གྲགས།། དེ་ལས་མངའ་ལས་སྐྱེས་པ་བྱུང་།། མི་མཇེད
23b6 འཇིག་རྟེན་རིམ་པར་ཆགས།། ཉོན་མོང་རགས་ཤིང་འབྲས་བུ་ངན།། མཐའ་མ་མནར་མེད་གནས་ལ་ཐུག། ཅེས་གསུངས་སོ།། སྤྲོས་བྲལ་དོན་གསལ་གྱི་རྒྱུད་ཆེན་པོ་ལས། ནང་བཅུད་ཀྱི་གྲུབ་ཚུལ་བསྟན་པའི་ལེའུ
iiif viewer powered by OpenSeadragon
