| e-texts navigator |
| Wylie |
178a1 པོ་འདི་རྟོགས་ཤིག། རྟོགས་པས་སངས་རྒྱས་ཀྱི་དགོངས་པ་ཁོང་དུ་ཆུད་པ་ཞེས་བྱའོ།། རླུང་ལ་ཡང་ཕྱི་ནང་གསང་བ་གསུམ་སྟེ། ཐོག་མའི་གནས་ནས་རིག་པ་བསྐྱོད་པ་གཞི་ལ་གནས་སོ།། ཕྱི་ཡི་རླུང
178a2 ནི་གླིང་བཞི་འདེགས་པ་དང་། རང་བྱུང་དུ་བསྐྱོད་པའི་རླུང་ངོ་།། ནང་གི་རླུང་ནི་འགྲོ་དང་སྐད་འདོན་པ་དང་བསྐྱོད་པའོ།། གསང་བའི་རླུང་ནི་འགྱུ་བ་དང་སྙམ་བྱེད་དང་དབུགས་འབྱུང་བའོ།། རླུང་གསུམ་པོ་དེ་ཡང
178a3 ཡེ་ཤེས་ཀྱི་རླུང་དུ་རྟོགས་ན་སྐུ་གསུམ་ཐོབ་བོ།། རྩ་ལ་ཡང་ཕྱི་ནང་གསང་གསུམ་སྟེ།། ཕྱི་ཡི་རྩ་ནི་ཆོས་ཉིད་རང་བྱུང་གི་རྩ་སྟེ། འོད་ལྔ་སྟེ་སྟོང་པ་རང་སྣང་དུ་ཤེས་པའོ།། ནང་གི་རྩ་ནི་རྣམ་རྟོག་རང་རིག་པའི་ཡེ་ཤེས
178a4 རང་ཤར་བ་སྟེ། རིག་པའི་ཡེ་ཤེས་སོ།། གསང་བའི་རྩ་ནི་དབུགས་དང་འགྱུ་བ་སྟོང་པ་ཉིད་ཀྱི་ཡེ་ཤེས་དབྱེར་མེད་པའི་ཆོས་སྐུ་ཟང་ཐལ་ལོ།། རྩ་དང་རླུང་དང་ཐིག་ལེ་གཏན་ལ་ཕབ་པ། སྐུ་གསུམ་ལྐོག་བཞེངས་ཀྱི
178a5 དགོངས་པ། བསྟན་མ་ཐག་ཏུ་ལྟ་སྒོམ་ལ་རག་མ་ལུས་པ་ལས་སངས་རྒྱས་ཀྱི་དགོངས་པ་སྐད་ཅིག་མ་ལ་ཐོབ་པ་ཟག་བཅས་ཕུང་པོའི་ནང་དུ། སངས་རྒྱས་ཀྱི་དགོངས་པ་དང་མཇལ་བ། ལམ་མ་བསྐྱོད་པར་རང་སར
178a6 སླེབས་པ། སྐུ་གསུམ་གྱི་དགོངས་པ་དུས་གཅིག་ལ་ཐོབ་པ། འཁོར་བའི་མངལ་ཁ་དུས་གཅིག་ལ་རྒྱས་ཐེབ་པ་ཞེས་བྱ་བའི་མན་ངག། མཛོད་ཀྱི་གདམས་པ། རྩ་རླུང་གི་ཐིག་ལེ་གཏན་ལ་ཕབ་པ། རྩ་རླུང་གི་རྩ་བ
iiif viewer powered by OpenSeadragon
