| e-texts navigator |
| Wylie |
131b1 གཞན་སེལ་ནི། མི་མཐུན་པའི་སྒྲུབ་བྱེད་བཏང་ངོ་།། ཕན་པའི་རྐྱེན་ལ་གནོད་པའི་འགལ་རྐྱེན་བཏང་ངོ་།། རང་རིག་པའི་ཡེ་ཤེས་དགག་སྒྲུབ་དང་བྲལ་བ་ནི། དབྱིངས་སུ་བཞག་སྟེ་བཙན་པའི་ཡུལ་མཁར་ལྟ
131b2 བུའོ།། དེའི་ཕྱོགས་ནས་བསྒྲུབ་པའོ།། གཏན་ཚིགས་གསུམ་དང་བཞིས་ཕན་པའི་རྐྱེན་བྱས་པའོ།། གནོད་པའི་རྐྱེན་དུ་ཡང་དེ་རྣམས་བསྟན་ནོ།། གཞི་སྣང་ལ་སོགས་པ་གང་རྩོད་ཀྱང་། གྲོགས་དེ་རྣམས་ཀྱིས་བྱས་ལ།།
131b3 ངས་བཤད་པ་བཞིན་དོན་གྱི་གནད་དྲི་བ་དང་ལན་གདབ་པར་བྱའོ།། མཐུན་ན་སྒྲུབ་བྱེད་ཀྱི་དབྱིངས་ལ་སྦྱར། མི་མཐུན་ན་གཞན་སེལ་གྱིས་བརྒལ་ལོ།། དོན་ངེས་པར་བྱེད་པ་དང་། ཐེ་ཚོམ་དང་བྲལ་བར་བྱེད་པ
131b4 དང་། ཤེས་བྱ་གཏན་ལ་འབེབས་པས་ན་གཏན་ཚིགས་ཞེས་བྱ་སྟེ། དེ་དང་རྗེས་སུ་མཐུན་པར་བཤད་དོ།། དེས་ཡིད་གཉིས་ཟ་བ་དང་བྲལ་བར་འགྱུར་རོ།། ཞེས་གསུངས་སོ།། སྤྲོས་བྲལ་དོན་གསལ་ཆེན་པོའི་རྒྱུད
131b5 ལས། འབྲུ་འཐོར་བ་སྡུད་པ་དང་། ཐེ་ཚོམ་དང་བྲལ་བར་བྱེད་པ་དང་། སྐྱོན་གྱི་མཐའ་བསལ་བའི་ལེའུ་སྟེ་བརྒྱ་དང་ཉེར་གཅིག་པའོ།། །། དེ་ནས་ཡང་སྟོན་པས་རྒྱུད་ཀྱི་མཚན་ཡོངས་སུ་བསྟན་པའི་ལེའུ་འདི
131b6 གསུངས་སོ།། གསང་བའི་བདག་པོ་རྡོ་རྗེ་འཛིན་པ་ཉོན་ཅིག། དོན་གྱི་མན་ངག་རྩ་བ་ཅར་ཕོག་གི།། དེ་ཉིད་སྤྲོས་བྲལ་དོན་གསལ་བསྟན་པ་ཡི།། མན་ངག་རྒྱུད་ཀྱི་སྤྱི་འགྲེལ་ཆེན་པོ་འདི།། གསང་བདག་ཞུ་བའི
iiif viewer powered by OpenSeadragon
