| e-texts navigator |
| Wylie |
72b1 བཅས་ཕྱོགས་ལྷུང་མེད།། ཚུལ་ཁྲིམས་ཕ་རོལ་ཕྱིན་པ་ཡིན།། སྙིང་པོའི་དོན་རྟོགས་ཅིར་ཡང་བཟོད།། བཟོད་པའི་ཕ་རོལ་ཕྱིན་པ་ཡིན།། དེ་ཡི་གདམས་པ་འཁོར་ལ་སྦྱིན།། སྦྱིན་པའི་ཕ་རོལ་ཕྱིན་པ་ཡིན།། གནས་ལུགས་སྙིང་པོ་བཞི་སྐོང་ཤེས།། ཡེ་ཤེས་ཕ་རོལ་ཕྱིན་པ་ཡིན།། ཆོས་སུའི་སྙིང་པོ་གནས
72b2 ལུགས་སོ།། སྨོན་ལམ་ཕ་རོལ་ཕྱིན་པ་རྫོགས།། གནས་ལུགས་ཐོ་ཆེན་བཞི་ཡིས་མཚོན།། ཐབས་ཀྱི་ཕ་རོལ་ཕྱིན་པ་ཡིན།། འཁོར་འདས་རྒྱ་ཐོས་མྱ་ངན་འདས།། སྟོབས་ཀྱི་ཕ་རོལ་ཕྱིན་པ་ཡིན།། གསང་སྔགས་འབྲས་བུ་བླ་མེད་འདིར།། ཐམས་ཅད་རྒྱུན་ཆད་མེད་པར་འབྲེལ།། རྒྱུད་དོ་ཅོག་གི་རྩ་བ་ཡིན།། དེ
72b3 ལུང་འཁོར་འདུས་ཕོ་མོས་བླངས།། ལུང་མཆོག་དགོངས་པ་འདུས་པ་ཡིན།། ཚེགས་མེད་པ་རུ་གསང་བ་ཤེས།། མན་ངག་ཚེགས་ཆུང་དོན་ཆེན་ཡིན།། དེས་ནི་རང་དབང་རང་རིག་ཐོབ།། དབང་མཆོག་རྒྱལ་པོ་རང་དབང་ཡིན།། གནས་ལུགས་སྙིང་པོ་བཞི་སྐོར་ཡིན།། འདའ་བའི་ས་མེད་དམ་ཚིག་མཆོག། སྙིང་པོ
72b4 དཀྱིལ་ལ་བཞི་སྐོར་འཁོར།། དཀྱིལ་འཁོར་འཕྲོས་པས་དཀྱིལ་འཁོར་མཆོག། གཉིས་སུ་མེད་པ་མཆོད་པའི་མཆོག། རྣལ་མར་རྟོགས་པས་རྣལ་འབྱོར་མཆོག། ཀུན་ལ་བསྔགས་པས་གསང་སྔགས་ཡིན།། ཀུན་གྱི་ལས་རྫོགས་ཕྲིན་ལས་ཡིན།། མཚན་ནས་བརྗོད་མེད་བསྒོམ་པ་ཡིན།། དེ་ལྟར་སྤྱོད་པས་སྤྱད
72b5 པ་ཡིན།། ནང་ངོ་རང་ཤེས་ལྷ་དང་མཇལ།། ཆོས་སྐུ་འབྲས་བུ་ལྷ་ཡི་མཆོག། ཅེས་གསུངས་སོ།། སྐུ་གསུང་ཐུགས་ཀྱི་རྒྱུད་ལས། ཐམས་ཅད་འབྲེལ་བ་རྫོགས་ཚུལ་གྱི་ལེའུ་སྟེ་སོ་གསུམ་པའོ།། །། དེ་ནས་ཡང་ལག་ན་རྡོ་རྗེས་རྡོ་རྗེ་འཆང་ལ་འདི་སྐད་གསོལ། ཀྱེ་ཀྱེ་རྡོ་རྗེ་ཆོས་ཀྱི་སྐུ།། རྒྱུད་ཆེན་འདི་ཡིད་དཔེ་ནི་གང་།། དེ་ལ་མཚན་དུ་ཇི
72b6 སྐད་གཟུང་།། དུས་ཚོད་གང་དུ་དར་བར་བྱེད།། ཅེས་གསོལ་པས།། རྡོ་རྗེ་ཆོས་སྐུས་བཀའ་སྩལ་པ།། ཉོན་ཅིག་རིག་འཛིན་རྡོ་རྗེ་འཛིན།། རྡོ་རྗེ་ཕོ་མོ་འདུས་པའི་ཚོགས།། ང་ཡི་རྒྱུད་ཆེན་ཀུན་ཡང་ས་འདིར།། དཔེར་ན་ནམ་མཁའ་ཇི་བཞིན་ཏེ།། ཕྱོགས་བཅུ་མི་དམིགས་ཕྱོགས་བཅུའི་གཞི།། ཁ་དོག་མ་ཡིན་ཁ་དོག་གཞི།། དཔེར་རྔ་ནམ
72b7 མཁའ་ཆེན་པོ་འདྲ།། དཔེར་ན་ཆུ་ཡི་རྒྱ་མཚོ་འདྲ།། དཔེར་ན་རིན་ཆེན་གསེར་དང་འདྲ།། དཔེར་ན་ནོར་བུ་རིན་ཆེན་འདྲ།། དཔེར་ན་མུན་པ་ཉི་མ་འདྲ།། དཔེར་ན་སྐྱེ་འཁྲུངས་ས་དང་འདྲ།། དཔེར་ནད་པ་མིག་མངས་འདྲ། དཔེར་ན་རྨ་བྱས་དུག་དང་འདྲ།། དཔེར་ན་ལྡན་མཁས་སྨན་དང་དྲ།། དཔེར་ན་འཇིམ་པའི་གཟུགས་དང་འདྲ།། དཔེར་ན
iiif viewer powered by OpenSeadragon
