| e-texts navigator |
| Wylie |
43a1 རྣམས་མཛད་ནས། ཐུགས་ཀ་ནས་ཁྲོ་ཆུང་མང་པོ་མཚོན་ཆ་འབར་བ་སྐར་མདའ་འཁྲུགས་པ་བཞིན་དུ་བྱུང་བས་ཁྲོ་བཅུའི་བར་དང་གོ་མཚམས་དང་གོ་དམིགས་ཐམས་ཅད་ཁྲོ་ཆུང་ཞལ་གསུམ་ཕྱག་དྲུག་ཕྱག་ན་མཚོན་ཆ་མང་པོ་བསྣམས་པ།
43a2 ཆེ་བ་དང་ཆུང་བ་གྲངས་བསམ་གྱིས་མི་ཁྱབ་པ། བར་མཚམས་དང་གོ་དམིགས་ཐམས་ཅད་བཀང་སྟེ། ཐ་ན་ཁབ་ཀྱི་རྩེ་མོ་ཙམ་ཡང་གཟུག་པའི་ས་མེད་པར་གྱུར་ཏེ། དེ་ཡང་ཁྲོ་བོ་གནོད་མཛེས་ཀྱི་ཤངས་འབར་བ་དང་། བ་སྤུའི་བུ་ག་ནས་རཾ་དམར་པོ་འབར་བའི
43a3 ཚ་ཚ་མགལ་བུ་དུམ་བུ་ཚིག་པ་ལྟར་བབས་ནས་འདི་སྐད་དོ།། ཕྱོགས་མཚམས་ཀུན་ཏུ་རྡོ་རྗེའི་མེ།། རྣམ་པར་འཕྲོ་བ་རབ་བསམས་ཏེ།། མ་རུངས་པ་དག་ཚིག་བྱས་ནས།། ཕྱོགས་བཅུར་རབ་ཏུ་འཕྲོ་བར་འགྱུར།། ཕྱོགས་མཚམས་ཕུར་པས་བཏབ་ནས་ནི།།
43a4 སྟེང་འོག་ཡང་དག་བྱིན་གྱིས་བརླབས།། འབར་བའི་འཕྲོ་འདུ་འཁྲུགས་པ་ཡིས།། རྡུལ་ཆ་ཙམ་ཡང་མེད་པར་བསྲེག། ཛྭ་ལ་རཾ་ཛྭ་ལ་རཾ་ཞེས་བརྗོད་པས། ཁྲོ་བོ་ཐམས་ཅད་ཀྱི་སྐུ་ལས་མེ་དཔུང་ཆེན་པོ་དུས་ཐ་མའི་བསྐལ་པའི་མེ་འབར་བ་ལྟར་ཤིན་ཏུ་མཆེད་པས
43a5 ཁྱུང་གི་སྒོ་ངའི་སྦུབས་སུ་ཞུགས་པའམ། རྡོ་རྗེའི་གུར་ཐབས་སུ་ཕུབ་པ་ལས། མེ་རི་འདབ་འབྱོར་དུ་གྱུར་པས། སྲིད་པ་གསུམ་གྱི་དངོས་པོ་ཡང་དུས་གཅིག་ཏུ་ཚིག་ན་གཞན་བར་དུ་གཅོད་པའི་བགེགས་ལྟ་ཅི་སྨོས་ཀྱི་རབ་ཏུ་འབར་བའི་སྲེག་པའི་མེ་དཔུང་དུ་གྱུར
43a6 ཏོ།། དེ་ནས་ཞེ་སྡང་རྡོ་རྗེ་འཛིན་པས་ཉིད་ལ་ཉིད་དམ་པའི་ཚིག་འདི་སྐད་དོ།། ཕྱོགས་བཅུའི་སངས་རྒྱས་ཐམས་ཅད་ཀྱི།། སྐུ་ཡི་སྲས་སུ་བདག་བསྐྱེད་ནས།། གསུང་མཆོག་ཡིག་འབྲུར་དབང་བསྐུར་ཏེ།། ཐུགས་ཀྱི་དབྱིག་ཏུ་བདག་བསྐྱེད་པས།། རྣམ
43a7 རྟོག་བདུད་ནི་མིང་ཡང་མེད།། རྒྱལ་བའི་དཀྱིལ་འཁོར་ཆེན་པོ་འདིར།། དུས་གསུམ་རྒྱལ་བ་བཞུགས་པའི་གནས།། རྣལ་འབྱོར་དགོངས་པ་མཐར་ཕྱིན་པའོ།། ཞེས་རོལ་པ་བསྐྱེད་དོ།། དེ་ལྟར་བསྟན་པས་ཕྱི་ནང་གི་ཆོས་ཐམས་ཅད་དང་སེམས་ཅན
iiif viewer powered by OpenSeadragon
