| e-texts navigator |
| Wylie |
246b1 རྣམ་པར་དག་པ་ན། བཅོམ་ལྡན་འདས་རྡོ་རྗེ་སེམས་དཔའ་དང་། རིགས་ལྔའི་སངས་རྒྱས་དང་། གསང་བའི་ཡུམ་དང་། འཁོར་སེམས་དཔའ་དང་སེམས་མ་དང་། ཁྲོ་བོ་དང་ཁྲོ་མོ་དང་། མཁའ་འགྲོ་མ་དང་སྤྲུལ་པ་འཁོར་དང་བཅས་པ་དང་ཐབས
246b2 ཅིག་ཏུ་བཞུགས་པའི་ཚེ། བཅོམ་ལྡན་འདས་དཔལ་རྡོ་རྗེ་སེམས་དཔའི་དབུའི་གཙུག་ཏོར་དྲང་པོ་ལས། འོད་ཟེར་བསམ་གྱིས་མི་ཁྱབ་པ་འཕྲོས་པས། ནམ་མཁའི་དབྱིངས་གང་ནས་གང་དུ་ཁྱབ་སྟེ་འཇིག་རྟེན་གྱི་ཁམས་ཐམས་ཅད་ཁྱབ་པས།
246b3 ལྷ་དང་ལྷ་མོའི་དཀྱིལ་འཁོར་བསམ་གྱིས་མི་ཁྱབ་པ། ཕྱག་ན་ཡང་རྣལ་འབྱོར་ཚོགས་ཀྱི་མཆོད་པ་བསམ་གྱིས་མི་ཁྱབ་པ་ཐོགས་པས། རྒྱལ་བའི་དཀྱིལ་འཁོར་རབ་འབྱམས་བསམ་གྱིས་མི་ཁྱབ་པ་ཐམས་ཅད་ལ། མཆོད་པའི་རྣམ་པ་ཐབས
246b4 དང་ཤེས་རབ་ཀྱི་ཚུལ་དུ་མཆོད། དགྱེས་པ་ཆེན་པོའི་གཟི་མདངས་ཀྱིས་ཚིམས་པར་མཛད། བདེ་བར་གཤེགས་པ་རྣམས་ཀྱི་སྐུ་གསུང་ཐུགས་ལ་ཕོག་པས། ཐུགས་དམ་ཆེན་པོའི་རྒྱུད་བསྐུལ་ཏེ། སྐུ་ལ་ཕོག་པས། མཛད་པའི་ཕྲིན་ལས་དང
246b5 མ་འགལ་བར་ཐུགས་དམ་བསྒྲལ། གསུང་ལ་ཕོག་པས། བདེན་པའི་ཆོས་ཉིད་ལས་མ་གཡོས་པར་ཐུགས་དམ་བསྐུལ། ཐུགས་ལ་ཕོག་པས། མཉམ་པའི་སེམས་མ་གཡོས་པར་ཐུགས་དམ་བསྐུལ། དབང་གི་མཆོག་ཞུས།
246b6 ལྷ་དབང་ལུས་ལ་བརྩེགས་པ་དང་། སྤྱི་དབང་འདོད་དགུར་བསྒྱུར་བ་དང་། མོས་དབང་སེམས་དང་འདྲེས་པ་དང་། གསང་དབང་ལྷུན་གྱིས་གྲུབ་པ་དང་། དབང་བཞི་མནོས། དངོས་གྲུབ་ཀྱི་མཆོག་ཞུས། སྐུའི་དངོས་གྲུབ་ཕྱག་རྒྱ་ཆེན
246b7 པོར་རང་སྣང་བ་དང་། གསུང་གི་དངོས་གྲུབ་ཆོས་ཉིད་མ་སྐྱེས་པར་དང་སྣང་བ་དང་། ཐུགས་ཀྱི་དངོས་གྲུབ་སེམས་ཡེ་ནས་སངས་རྒྱས་སུ་མནོས། སྐྱེ་འགྲོ་མིང་དང་གཟུགས་ཀྱིས་བསྡུས་པ་ཐམས་ཅད་ལ་ཁྱབ་པས། སེམས་ཅན་གྱི་དོན་བྱས
iiif viewer powered by OpenSeadragon
