| e-texts navigator |
| Wylie |
21a1 སྐྱེ་མེད་སྙིང་པོ་ཐུགས་ཀྱི་རང་བཞིན་ལ།། སྒྲིབ་དང་མི་སྒྲིབ་ཁྱད་པར་བསྟན་པ་མེད།། ཀྱཻ་སེམས་དཔའ་རྡོ་རྗེ་ལེགས་པར་ད་བསྒོམས་ཤིག། སྐྱེ་མེད་ཆོས་ཀྱི་དབྱིངས་སུ་གཅིག་པ་ལ།། སྒྲིབ་དང་མི་སྒྲིབ་སྤོང་ལེན་གང་འདོད་པ།
21a2 དམ་པའི་སྙིང་པོའི་དོན་དང་འགལ་བར་འགྱུར།། ཀུན་བྱེད་བྱང་ཆུབ་སེམས་ཀྱིས་ལུང་བསྟན་པ།། སྐྱེ་མེད་བསྒོམས་པས་སྐྱེ་བ་སྙིང་པོར་གསལ།། མཁའ་ལྟར་རྟོག་དཔྱོད་འདས་ལ་གང་གནས་པས།། སྒྲིབ་དང་མི་སྒྲིབ་བྱང་ཆུབ་སེམས་སུ་གནས།།
21a3 ཀྱཻ་ཀུན་བྱེད་རྒྱལ་པོས་འཁོར་ལ་ལུང་བསྟན་པ།། ཡེ་ཤེས་སྒྲུབ་མེད་གསལ་བའི་དོན་དུ་བཤད།། རང་བྱུང་རྒྱུ་རྐྱེན་མེད་པའི་སྙིང་པོར་གནས།། རྟོགས་པས་སྒྲོ་སྐུར་འདས་པའི་དགོངས་པ་ཡིན།། ཀྱཻ་དེ་ཕྱིར་སེམས་དཔའ་རྡོ་རྗེ་བསྒོམས་ཤིག། རང
21a4 བྱུང་ཡེ་ཤེས་དམིགས་པ་ཀུན་ལས་འདས།། རྟོགས་པའི་དམིགས་པའི་དོན་དུ་གཞོག་མི་བྱེད།། ཡུལ་ལས་འདས་པས་རྣམ་ཤེས་བསྲུང་མི་བྱེད།། དངོས་པོ་སྙིང་པོར་གསལ་བས་བསྒོམ་མི་བྱེད།། རྣམ་པ་སྙིང་པོར་གསལ་བས་རེ་དོགས་མེད།། ཀྱཻ
21a5 སྟོན་པའི་སྟོན་པའི་ཀུན་བྱེད་རྒྱལ་པོ་ཡིས།། མ་བཅོས་འཁོར་གྱི་ནང་དུ་ལུང་བསྟན་པ།། མ་བཅོས་སྙིང་པོ་ཆོས་ཀུན་རྩ་བ་ལ།། ཇི་ལྟར་སྣང་བས་གཏན་ལ་འབེབས་པར་བྱེད།། སྙིང་པོ་རང་བཞིན་གཅིག་གི་དོན་རྟོགས་ན།། ཀུན་གྱི་རང་བཞིན་ཀུན་བྱེད
21a6 ཉིད་དུ་འདུས།། དེས་ན་ཀུན་བྱེད་ང་ཡི་དོན་མཁས་ན།། བསམ་གྱིས་མི་ཁྱབ་ཆོས་ལ་མཁས་པར་འགྱུར།། ཀུན་བྱེད་ང་ཡི་དོན་ལ་གོམས་གྱུར་ན།། ཀུན་གྱི་དོན་ལ་གནས་ཤིང་གོམས་པ་ཡིན།། ཀྱེ་སེམས་དཔའ་རྡོ་རྗེ་ལེགས་པར་ད་བསྒོམས་ཤིག།
iiif viewer powered by OpenSeadragon
