| e-texts navigator |
| Wylie |
319b1 གཟུངས་ཀྱི་དབང་ཕྱུག་རྒྱལ་པོས་ལྟས་རྨད་དུ་བྱུང་བ་དེ་མཐོང་ནས། ལྟས་སྔོན་མ་མཐོང་བ་ལ་ཐེ་ཚོམ་སྐྱེས་ཏེ། དེ་སྟན་ལས་ལངས་ཏེ་ཐལ་མོ་སྦྱར་ཏེ། རྫུ་འཕྲུལ་མངོན་པར་ཤེས་པའི་ལྟས་འདི་སུས།
319b2 བགྱིས་ཞེས། སངས་རྒྱས་བཅོམ་ལྡན་འདས་ལ་ཚིགས་སུ་བཅད་པས་ཞུས་པ། དེང་སུ་བྱང་ཆུབ་ཡང་དག་མཐར་ཐུག་གྱུར།། ཐམས་ཅད་ལྡན་པོའི་འོད་ཟེར་སུ་ཡིས་བཏང་། འཇིག་རྟེན་མགོན་པོ་ཅི
319b3 སླད་ཕྱོགས་བཅུ་ཡི།། ཞིང་རྣམས་གསེར་མཆོག་འདྲ་བར་གནས་པར་གྱུར།། སྟོང་གསུམ་འདི་ནི་ཅི་སླད་ཚིག་པ་འདྲ།། དེང་འདིར་སུ་ཞིག་གིས་ནི་དབང་ཐོབ་ལགས།། སྔོན་ཆད་མ་བྱུང་རྫུ་འཕྲུལ་སྟོབས
319b4 སུས་བསྟན།། སུ་ཡིས་འདིར་ནི་ཞིང་རྣམས་གཡོས་པར་བགྱིས།། ཅི་སླད་ལྷ་དང་ཀླུ་རྣམས་ཁྱིམ་འཁྲུགས་ཤིང་།། གཞལ་མེད་ཁང་མཆོག་དག་ཀྱང་རབ་འགུལ་དང་།། ཐམས་ཅད་སྐྲག་ནས་རྣམ་པར་བལྟ
319b5 ཞིང་མཆིས།། ཅི་ཡི་སླད་དུ་སྟོང་གསུམ་གཡོས་པ་དང་།། གང་གིས་འཁོར་འདི་རེ་ཐེ་ཚོམ་སྐྱེས་གྱུར་དེའི།། རྒྱུ་དང་སུ་ཡི་མཐུ་ལགས་མ་འཚལ་ན།། ཅི་སླད་རྫུ་འཕྲུལ་མངོན་ཤེས་བསྟན་བགྱིས་པ།
319b6 རྒྱལ་བ་བྱམས་པའི་ཐུགས་ཅན་བཀའ་སྩལ་གསོལ།། བཅོམ་ལྡན་འདས་ཀྱིས། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་རྒྱལ་པོ་ལ་བཀའ་སྩལ་པ། ཀྱེ་རིགས་ཀྱི་བུ་ཁྱོད་ལ་སོགས་པ་འདི་ལྟར
319b7 ཤེས་པར་གྱིས་ཤིག། ད་ལྟར་འཁོར་གྱི་དཀྱིལ་འཁོར་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་མིང་འཕགས་པ་སྤན་རས་གཟིགས་དབང་ཕྱུག་ཅེས་བྱ་བ་ཞིག་ཡོད་དེ་འདི་ནི་བསྐལ་པ་དུ
iiif viewer powered by OpenSeadragon
