| e-texts navigator |
| Wylie |
198a1 རྣམས་སེམས་ཅན་ཐམས་ཅད་ལ་ཕན་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་པའི་དམ་ཚིག་འགྲོན་ལ་ཚུད་ཅིག། དེ་ནས།
198a2 ཡང་ཕྱག་ན་རྡོ་རྗེས་གསོལ་པ། བཅོམ་ལྡན་འདས་མཁའ་འགྲོ་མ་ལ་སོགས་པ་འདི་དག་ལ་ནན་ཏན་ཇི་ལྟར་བགྱི། རིམས་ལ་སོགས་པ་ཇི་ལྟར་བགྱི། དམྱལ་བ་ལ་སོགས་པ་ངན་སོང་གི་འགྲོ་བ་རྣམས་ཇི་ལྟར་བགྱི།།
198a3 བཅོམ་ལྡན་འདས་ཀྱིས་གསུངས་པ། དམ་ཚིག་དེ་ཉིད་ལ་ནན་ཏན་བྱེད་དུ་ཚུད་ཅིག། དེ་ནས་ཕྱག་ན་རྡོ་རྗེས་ཡང་གསོལ་པ། བཅོམ་ལྡན་འདས་མི་འདི་རྣམས་ཇི་ལྟར་ནན་ཏན་བགྱི། བཅོམ་ལྡན་འདས་ཀྱིས་གསུངས
198a4 པ་དེ་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོར་བཙུད་ནས་རྡོ་རྗེའི་དཀྱིལ་འཁོར་དུ་ཚུད་ཅིག། རྡོ་རྗེའི་དཀྱིལ་འཁོར་དུ་བཙུད་ནས་དམ་ཚིག་གི་དཀྱིལ་འཁོར་དུ་ཚུད་ཅིག། དམ་ཚིག་གི་དཀྱིལ་འཁོར་དུ
198a5 བཙུད་ནས་ལས་ཀྱི་དཀྱིལ་འཁོར་དུ་ཚུད་ཅིག། དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ། བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་ཚིགས་སུ་བཅད་པ་འདི་སྨྲས་སོ།། སེམས་ཅན་ཀུན་ལ་ཕན
198a6 པའི་ཕྱིར།། སངས་རྒྱས་ཀུན་གྱིས་བྱིན་བརླབས་ཏེ།། གྲུབ་པ་ཐམས་ཅད་བྱེད་པའི་མཆོག། དཀྱིལ་འཁོར་ཆེན་པོ་བཤད་པར་བྱའོ།། དེ་ནས་ཡང་དག་རབ་བཤད་པ།། དཀྱིལ་འཁོར་ཆེན་པོ་དམ་པ་སྟེ།
198a7 ཆོས་ཀྱི་དཀྱིལ་འཁོར་ཚུལ་འདྲ་བར།། དཀྱིལ་འཁོར་ཐམས་ཅད་ཐིག་གདབ་བོ།། དེ་ལ་སྲད་བུ་བྲེ་བའི་ཆོ་ག་ནི།། འདི་ལྟ་སྟེ། གསར་ཞིང་ལེགས་པར་བྱས་པ་དང་།། ཚད་མ་བཟང་པོའི་སྲད་བུ་ཡིས།། ཤེས
iiif viewer powered by OpenSeadragon
