| e-texts navigator |
| Wylie |
41a1 ཀའི་རྒྱུད།། མཐར་ཐུག་རྒྱུད་ཀྱི་རྒྱལ་པོ་སྟེ།། དེ་རྣམས་ཀུན་ལ་དབང་བྱེད་པ།། ལོག་ལྔའི་རྒྱུད་སོགས་སྤོང་བར་བྱེད།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ
41a2 པ་དང་། བྱང་ཆུབ་སེམས་དཔའི་འཁོར་དཔག་ཏུ་མེད་པ་རྣམས་དགའ་ཞིང་མགུ་ནས་རྗེས་སུ་ཡི་རངས་ཏེ།། གཡས་ཕྱོགས་ནས་ལན་གསུམ་བསྐོར་བ་བྱས་ཏེ། སོ་སོའི་རྫུ་འཕྲུལ་གྱིས་མི་སྣང
41a3 བར་གྱུར་ཏོ།། དཔལ་རྡོ་རྗེ་འཇིགས་བྱེད་རྣམ་པར་འཇོམས་པའི་རྒྱུད་ཀྱི་རྒྱལ་པོ་རྫོགས་སོ།། ། བླ་མ་ག་ཡ་དྷ་ར་དང་། ལོ་ཙ་བ་ཤཱཀྱ་ཡེ་ཤེས་ཀྱིས་བསྒྱུར་བའོ།།
41a4 རྒྱ་གར་སྐད་དུ། ཤྲཱི་མ་ཧཱ་བ་ལ་ཛྙཱ་ན་རཱ་ཛ་ཏནྟྲ་རཱ་ཛ། བོད་སྐད་དུ། དཔལ་སྟོབས་ཆེན་ཡེ་ཤེས་རྒྱལ་པོའི་རྒྱུད་ཀྱི་རྒྱལ་པོ།། དཔལ་རྡོ་རྗེ་སེམས
41a5 དཔའ་ལ་ཕྱག་འཚལ་ལོ།། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་ཁོ་ན་ཉིད་བཙུན་མོའི་བྷ་ག་ལ་འཁོར་དཔའ་བོ་རྡོ་རྗེ་ལ་སོགས་པ་མཁའ་འགྲོ་མ་དང་། མ་མོའི་ཚོགས
41a6 ཀྱིས་བསྐོར་ཏེ་བཞུགས་པའི་དུས་སུ། དཔའ་བོ་རྡོ་རྗེ་མཁའ་འགྲོ་ལ་སོགས་པས་གཡོན་ཕྱོགས་སུ་བསྐོར་བ་ལན་གསུམ་བྱས་ནས་ཕྱོགས་གཅིག་ཏུ་འཁོད་དོ།། དཔའ་བོ་རྡོ་རྗེས་བཅོམ་ལྡན་འདས
41a7 ལ་སྤྱི་བོས་གཏུགས་ཏེ་ཧ་ཧ་ཞེས་པ་གསུམ་བརྗོད་ནས། བཅོམ་ལྡན་འདས་ལ་གསོལ་པ། རྩ་ནི་གང་ལགས་རླུང་གང་ལགས།། ཐིག་ལེ་གང་ལགས་གྲངས་ནི་དུ།། དེ་ལ་སེམས་གཟུང་ཇི་ལྟར་ལགས།།
iiif viewer powered by OpenSeadragon
