| e-texts navigator |
| Wylie |
205a1 རབ་ཏུ་མཁྱེན་པ་དེ་ལྟ་བུས་སྒྲིབ་པར་འགྱུར་བའི་ལས་བཤགས་པར་བགྱི་བ་དེ་བཞིན་དུ་ཅི་ནས་ཀྱང་བདག་གིས་བཤགས་པས་ལེགས་པར
205a2 བཤགས་པར་འགྱུར་བ་དང་། ཡོངས་སུ་དག་པར་འགྱུར་བ་དང་། འོད་གསལ་བར་འགྱུར་བ་དང་། ཁ་ན་མ་ཐོ་བ་མ་མཆིས་པར་འགྱུར་བ་དང་། བསྩལ་བར་འགྱུར་བ་དང་།
205a3 དུག་མ་མཆིས་པར་འགྱུར་བ་དང་། སྒྲིབ་པ་མ་མཆིས་པར་འགྱུར་བ་དང་། བར་དུ་གཅོད་པ་མ་མཆིས་པར་འགྱུར་བ་དང་། ཡོན་ཏན་གྱི་ཆོས་ཐམས་ཅད་སྒྲུབ་པར་འགྱུར་བ་དེ་ལྟ
205a4 བུར་སྒྲིབ་པར་འགྱུར་བའི་ལས་ཀྱི་ཉེས་པ་ཐམས་ཅད་འཆགས་སོ།། ཇི་ལྟར་བདག་གིས་དོན་དུ་བཤགས་པ་དེ་བཞིན་དུ། འཇིག་རྟེན་གྱི་ཁམས་རབ་འབྱམས་མ་ལུས་པ་ཐམས
205a5 ཅད་ན། སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ། སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་བསྒྲིབ་པར་འགྱུར་བའི་ལས་ཀྱི་ཉེས་པ་འཆགས་སོ།། དེ་ལྟར
205a6 བདག་གིས་ལས་ཀྱི་ཉེས་པ་སྒྲིབ་པར་འགྱུར་བ་ཐམས་ཅད་སོ་སོར་བཤགས་ནས། སྒྲིབ་པ་མ་མཆིས་པ་རྣམ་པར་དག་པའི་དཀྱིལ་འཁོར་ལ་གནས་ཏེ། འགྲོ་བ་ཐམས་ཅད་ཀྱི་དགེ་བའི་རྩ
205a7 བ་ལ་རྗེས་སུ་ཡི་རང་ངོ་།། དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ངན་སོང་དབུལ་པོ་ཡི་དགས་ཀྱི་མི་ཁོམ་པར་མཆི་བ་ཐམས་ཅད་རྣམ་པར་ཟློག་པ་དེ་ལ་ཡང་རྗེས་སུ་ཡི་རང་ངོ་།།
iiif viewer powered by OpenSeadragon
