| e-texts navigator |
| Wylie |
60a1 དེའི་ཚེ་སེམས་ཅན་རྣམས་འདོད་ཆགས་དང་། ཞེ་སྡང་དང་། གཏི་མུག་ཤིན་ཏུ་ཆེ་བས། ཉོན་མོངས་པ་རྣམས་ཀྱིས་ཟིལ་གྱིས་ནོན་པས། ཕ་མ་དང་། ཕུ་ནུ་དང་། གྲོགས་པོའི་ཡིད་དང་ག
60a2 བར་བྱེད་པ། མཁན་པོ་དང་སློབ་དཔོན་གྱི་རྗེས་སུ་མི་འབྲང་བ། བྱས་པའི་དྲིན་མི་གཟོ་བ། རྟག་པར་གནོད་སེམས་དང་བཅས་པ། གཡོ་སྒྱུ་དང་རྐུན་བུའི་སེམས་དང་ལྡན་པ། ཕན་ཚུན་གཅིག་ལ་གཅིག་གནོད
60a3 པ་བྱེད་པ། ཚུལ་བཞིན་མ་ཡིན་པར་སྤྱོད་པ། སངས་རྒྱས་དང་། ཆོས་དང་། དགེ་འདུན་ལ་གུས་པ་མེད་པ།། སེར་སྣས་ཟིལ་གྱིས་ནོན་པས་ཡི་དགས་ཀྱི་ཆོས་སྤྱོད་པའི་སེམས་ཅན་དེ་ལྟ་བུ་ཤ་སྟག། སངས
60a4 རྒྱས་ཀྱི་ཞིང་དེ་ན་གནས་པར་གྱུར་པས་ནི་ཤིན་ཏུ་གདུལ་དཀའ་བར་གྱུར་ཏོ།། དེའི་ཚེ་བཅོམ་ལྡན་འདས་དེའང་སྔོན་གྱི་སྨོན་ལམ་གྱི་མཐུས།། དུས་ངན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར
60a5 རྫོགས་པར་སངས་རྒྱས་པར་གྱུར་ཏེ། བཅོམ་ལྡན་འདས་དེ་ལ་ཉན་ཐོས་ཆེན་པོའི་ཚོགས་ནི་ཉི་ཁྲི་ཉིས་སྟོང་མངའ་བར་གྱུར་ཏོ།། དེའི་ཚེ་དེའི་དུས་ན་རྒྱལ་པོ་རྒྱལ་ཆེར་བྱིན་པ་ཞེས་བྱ་བ་འཛམ་བུ་གླིང
60a6 ལ་དབང་བའི་དབང་ཕྱུག་དང་ལྡན་པ། སངས་རྒྱས་ཀྱི་བསྟན་པ་ལ་སེམས་ཤིན་ཏུ་དང་བར་གྱུར་པ་ཞིག་ཡོད་པ་དེས།། དེ་བཞིན་གཤེགས་པ་དེ་ཉན་ཐོས་ཀྱི་དགེ་འདུན་དང་བཅས་པར་དབྱར་ཟླ་བ་གསུམ་སྤྱན་དྲངས་ཏེ།
60a7 མཆོད་པ་རྒྱ་ཆེར་བཤམས་ནས་མཆོད་ཅིང་རིམ་གྲོ་བྱས་སོ།། དེའི་ཚེ་དགེ་སློང་དྲི་མ་མེད་པ་ཞེས་བྱ་བ་སྤོབས་པ་ཕུན་སུམ་ཚོགས་པ། ཆོས་སྟོན་པའི་ཐབས་ལ་མཁས་པས་འཁོར་མང་པོ་རྣམས་ཉན་པར་སློ།
iiif viewer powered by OpenSeadragon
