| e-texts navigator |
| Wylie |
72a1 པར་བྱའོ། ། ཞེས་བྱ་བ་བཅོམ་ལྡན་འདས་ཐོག་མ་དང་མཐའ་མ་མེད་པའི་འཕྲིན་ལས་ཀྱི་རྡོ་རྗེ་སེམས་དཔས་གསུངས་སོ།། ཤིན་ཏུ་རིང་བའི་ཚེ་འཕེལ་བ་ནི་བདེ་བ་ཆེན
72a2 པོའི་རྡོ་རྗེའི་ཆོས་སོ། ། ཤིན་ཏུ་གཞོན་པའི་ན་ཚོད་འཕེལ་བ་ནི་བདེ་བ་ཆེན་པོའི་རྡོ་རྗེའི་བཅུད་ཀྱིས་ལེན་གྱིས་སོ།། གཟུགས་ཆེན་པོ་དང་གཟི་བརྗིད་ཆེན་པོ་འཕེལ་བ་ནི་བདེ་བ་ཆེན་པོའི
72a3 རྡོ་རྗེའི་གཟུགས་ཀྱི་གཟི་བརྗིད་ཀྱིས་སོ། ། འདུ་བྱེད་ཆེན་པོ་ཐམས་ཅད་འཕེལ་བ་ནི་བདེ་བ་ཆེན་པོ་རྡོ་རྗེ་འདུ་བྱེད་ཆེན་པོས་སོ།། སེམས་ཅན་ཐམས་ཅད་ཀྱི་བདག་ཉིད་ཐམས་ཅད་སྲུང་བ
72a4 ནི་བདེ་བ་ཆེན་པོ་རྡོ་རྗེ་སྲུང་བས་སོ། ། ཕྱོགས་ཐམས་ཅད་དང་། མཚམས་དང་། དཀྱིལ་འཁོར་བཅིངས་པ་ནི་བདེ་བ་ཆེན་པོ་རྡོ་རྗེ་བསྐོར་བས་ཏེ། ཐམས་ཅད་རྡོ་རྗེ་ཆེན་པོའི་ངོ
72a5 ཉིད་ཁྲོ་བོའི་རྒྱལ་པོ་ཆེན་པོ་རྡོ་རྗེས་ཀྱང་འཇུག་པར་མི་ནུས་ཤིང་མི་ཕྱེད་པར་འགྱུར་རོ། ། སྲིད་པ་ཐམས་ཅད་སྲུང་བ་ནི་བདེ་བ་ཆེན་པོའི་རྡོ་རྗེའི་བྱིན་གྱིས་བརླབས་པས་སོ།། བདག་ཉིད་ཀྱི
72a6 དངོས་གྲུབ་ཐམས་ཅད་དམ་གཞན་དག་རྡོ་རྗེ་བྱེད་པ་ནི་བདེ་བ་ཆེན་པོའི་གོ་ཆས་སོ། ། འཐབ་མོ་ཐམས་ཅད་ལས་རྣམ་པར་རྒྱལ་བ་ནི་བདེ་བ་ཆེན་པོའི་རྡོ་རྗེ་རྒྱལ་མཚན་མཆོག་གི་དཔུང་རྒྱན
72a7 གྱིས་སོ། ། འཐབ་མོ་སྲུང་བ་ནི་བདེ་བ་ཆེན་པོའི་གཞན་གྱིས་མི་ཐུབ་པས་སོ།། གཞན་གྱི་དཔུང་ཐམས་ཅད་བཤིག་པ་ནི་རྡོ་རྗེ་བདེ་བ་ཆེན་པོའི་རྡོ་རྗེ་འཛིན་པས་སོ།། གཞན་གྱི་དཔུང
iiif viewer powered by OpenSeadragon