| e-texts navigator |
| Wylie |
63a1 བའི་གཟུགས་ཅན་རྣམས་སྐད་སྙན་པ་འབྱིན་ཏོ། ། དེ་དག་གི་ཉེན་ཀོར་ན་མེ་ཏོག་གི་ཤིང་དང་། འབྲས་བུའི་ཤིང་སྣ་ཚོགས་ཡོད་པ་རྣམས་ལེགས་པར་སྐྱེས་ཤིང་། དབྱིབས་ལེག།
63a2 པར་ཡོངས་སུ་གྲུབ་པ་སྟེ། མེ་ཏོག་གི་འཕྲེང་བ་བཀོད་པ་བཞིན་དུ་གྱུར་པ་ནི། དཔེར་ན་མེ་ཏོག་འཕྲེང་རྒྱུད་དམ། མེ་ཏོག་འཕྲེང་རྒྱུད་ཀྱི་སློབ་མ་མཁས་པས་མེ་ཏོག་གི་འཕྲེང་བ་ཐ་གུ་ལ་བརྒྱུས་པ་དང
63a3 མེ་ཏོག་གི་རྣ་རྒྱན་ལེགས་པར་བྱས་པ་བཞིན་ཏེ། ཐང་ལས་སྐྱེས་པའི་བྱ་སྣ་ཚོགས་སྐད་སྙན་ཅིང་འཇེབས་པ་དང་། སྐད་ཡིད་དུ་འོང་བ་དང་། སྐད་མཉེན་པ་དང་། འདོད་དགུར་སྒྱུར་བའི་གཟུགས་ཅན
63a4 རྣམས་སྐད་སྙན་པ་འབྱིན་ཏོ། ། དཔག་བསམས་ཀྱི་ཤིང་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཡོད་དོ།། རྒྱས་པར་སྔ་མ་བཞིན་ནོ།། དེ་དག་ན་གཞལ་མེད་ཁང་ན་གནས་པའི་ལྷའི
63a5 བུ་རྣམས་རྩེ་ཞིང་དགའ་ལ་དགའ་དགུར་སྤྱོད་དེ། རང་གི་ལས་ཀྱི་འབྲས་བུ་ཉམས་སུ་མྱོང་ངོ་།། ཉི་མས་ཟླ་བ་དྲུག་ཏུ་བགྲོད་པ་གང་ཡིན་པ་དེ་ནི་ཟླ་བས་ཟླ་བ་གཅིག་ཏུ་འགྲོ་བ་དང་འོང་བར་བྱེད་དོ།། ཅིའི་ཕྱིར
63a6 ཉི་མའི་དཀྱིལ་འཁོར་ལ་བལྟས་ན། མིག་ལ་གནོད་པར་འགྱུར་ལ། ཟླ་བའི་དཀྱིལ་འཁོར་ལ་བལྟས་ན། མིག་ལ་གནོད་པར་མི་འགྱུར་ཞེ་ན། སྨྲས་པ། ཟླ་བའི་དཀྱིལ་འཁོར་ནི་ཆུ་ཤེལ་ཡང་ཡིན་ལ།
63a7 ཤེལ་དང་བ་ཡང་ཡིན་ལ། ཉི་མའི་དཀྱིལ་འཁོར་ནི་མེ་ཤེལ་ཡིན་པས་དེའི་ཕྱིར་ན། ཉི་མའི་དཀྱིལ་འཁོར་ལ་བལྟས་ན་མིག་ལ་གནོད་པར་འགྱུར་ལ། ཟླ་བའི་དཀྱིལ་འཁོར་ནི་གནོད་པར་མི་འགྱུར་རོ།།
iiif viewer powered by OpenSeadragon
