| e-texts navigator |
| Wylie |
83a1 བགྱིར་དེ་བཞིན་གཤེགས་པས་སེམས་ཅན་ཐམས་ཅད་ཀྱི་དོན་གྱི་སླད་དུ། དེ་ཅིའི་རྒྱུ་ཅིའི་རྐྱེན་གྱིས་ལྷུང་བ་དང་། དམྱལ་བའི་དབྱིབས་ཆེ་ཆུང་དང་། རྣམ་པར་སྨིན་པའི་སྡུག་བསྔལ
83a2 བསྐལ་པའི་གྲངས་ཇི་ཙམ་གྱི་བར་དུ་གནས་པར་འགྱུར་བ་བཤད་དུ་གསོལ་ཞེས་བགྱིས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཤིན་ཏུའང་མཁས་སོ།། ཤིན་ཏུའང་མཁས་སོ།།
83a3 དོན་འདི་ལྟ་བུ་འདྲི་བའང་ཤིན་ཏུ་མཁས་ཏེ། ལེགས་པར་ཉོན་ལ་ཕལ་མང་པོ་རྣམས་ཀྱང་ལེགས་པར་སོམས་ཤིག། ངས་བྱེ་བྲག་ཕྱེད་པར་བཤད་དོ།། ཇི་ལྟར་ན་མནར་མེད་པའི་སེམས་ཅན་དམྱལ་བ་ཞེས
83a4 བྱ་ཞེ་ན། སྐད་ཅིག་ཀྱང་མནར་ཞིང་བསྟིར་མེད་པའི་ཕྱིར། མནར་མེད་པའི་དམྱལ་བ་ཞེས་བྱའོ།། གཅིག་ཏུ་ན་འགག་པ་འམ། འོང་བར་བྱ་བའང་མེད། འགྱུར་བའང་མེད་དེ། ཚ་བ་ནི་རབ་ཏུ་ཚ། སྡུག
83a5 བསྔལ་བ་ནི་ཤིན་ཏུའང་མི་བཟད་པ། སྐད་ཅིག་ཀྱང་མི་དལ། སྐད་ཅིག་ཀྱང་མི་སྡོད་ཅིང་བར་སྐབས་མེད་པའི་ཕྱིར། མནར་མེད་པའི་དམྱལ་བ་ཞེས་བྱའོ།། ཡང་རྣམ་པ་གཅིག་ཏུ་ན། མེ་ཆེན་པོ་འབར་བ
83a6 རབ་ཏུ་ཚ་བ། ཀུན་ཏུ་འབར་བ། རབ་ཏུ་འབར་ཞིང་མཆེད་པ། ཁོང་དུ་ཞུགས་པའི་ཕྱིར། མནར་མེད་པའི་དམྱལ་བ་ཞེས་བྱའོ།། བཅོམ་ལྡན་འདས་ཀྱིས་ཡང་འཇམ་དཔལ་ལ་བཀའ་སྩལ་པ། རིགས
83a7 ཀྱི་བུ་དམྱལ་བ་ཆེན་པོ་མནར་མེད་པའི་དབྱིབས་ནི་གྲུ་བཞི་ལྷམ་པ། དཔག་ཚད་བརྒྱད་ཁྲི་ཡོད་དེ། ལྕགས་ཀྱི་ར་བ་རིམ་པ་བདུན་གྱིས་བསྐོར་ཅིང་། སྟེང་དུའང་ལྕགས་ཀྱི་དྲ་བ་རིམ་པ་བདུན་གྱིས་གཡོགས་ཏེ།
iiif viewer powered by OpenSeadragon
