| e-texts navigator |
| Wylie |
257a1 གྲོགས་པོ་དག་གཞན་ཡང་བཞི་པོ་འདི་དག་ནི། དེ་བཞིན་གཤེགས་པ་ལ་མཆོད་པ་ཁྱད་པར་དུ་འཕགས་པ་ཡིན་ཏེ། བཞི་གང་ཞེ་ན། བསླབ་པ་ལས་འགལ་བར་མི་བྱེད་པ་དང་། བྱམས་པའི
257a2 ལུས་དང་། ངག་དང་། ཡིད་ཀྱི་ལས་དང་། དཀོན་མཆོག་གསུམ་གྱི་གདུང་མི་འཆད་པར་བྱ་བའི་བྱང་ཆུབ་ཀྱི་སེམས་དང་། ཇི་ལྟ་ཐོས་པའི་ཆོས་ལ་སོ་སོར་རྟོག་པའི་ཆོས་ཀྱི་ནན་ཏན་ཏེ། བཞི་པོ་དེ་དག་ནི་དེ་བཞིན
257a3 གཤེགས་པ་ལ་མཆོད་པ་ཁྱད་པར་དུ་འཕགས་པའོ། ། བསྟན་པ་འདི་ཐོས་ནས་ལྷའི་འཁོར་དང་། ལྷ་མ་ཡིན་གྱི་འཁོར་དེ་དག་གི་ནང་ནས་བཞི་ཁྲིས་བྱང་ཆུབ་ཏུ་སེམས་བསྐྱེད་དོ།། དེ་ནས་བཅོམ
257a4 ལྡན་འདས་ལ། ཀླུའི་རྒྱལ་པོ་དབུགས་ཅན་དང་། ཀླུའི་རྒྱལ་པོ་དབུགས་ཅན་ཆེན་པོ་དང་། འཇོག་པོ་དང་། ཁ་དོག་མཐའ་ཡས་ཀྱིས་འདི་སྐད་ཅེས་གསོལ་ཏོ།། བཅོམ་ལྡན་འདས་རྒྱ་མཚོ་ཆེན་པོ་འདིའི་ནང་ན། ཀླུའི
257a5 རིགས་ཚད་མ་མཆིས་པ་ལས་ཀྱི་རྣམ་པར་སྨིན་པ་སྣ་ཚོགས་ལས་སྐྱེས་པ་དག་མཆིས་ཏེ། དེ་ལ་ཁ་ཅིག་ནི་དབང་ཆེ་བར་གྲགས། ཁ་ཅིག་ནི་ལུས་ཉམ་ཆུང་ཞིང་ཆུང་བར་གྲགས་ལ་ལུས་ཆུང་བ་དག་ཀྱང་མཆིས་ཏེ། བཅོམ
257a6 ལྡན་འདས་བྱའི་རྒྱལ་པོ་ནམ་མཁའ་ལྡིང་བཞི་དེར་བབས་ནས། ཀླུའི་གཞོན་ནུ་དང་། ཀླུའི་བུ་མོ་ལུས་ཉམ་ཆུང་བ་རྣམས་བཏོན་ཏེ། འཚལ་བར་བགྱིད་ལ། རྒྱ་མཚོའི་ནང་གི་ཀླུའི་རིགས་ཐམས་ཅད་ཀྱང་སྐྲག་པར་བགྱིད
257a7 ལགས་ན། ཅི་ནས་རྒྱ་མཚོ་ཆེན་པོའི་ཀླུ་དེ་དག་ཐམས་ཅད་ཀྱང་། འཇིགས་པ་མ་མཆིས་པ་དང་། སྐྲག་པ་མ་མཆིས་པར་གནས་པར་འགྱུར་བ་དེ་ལྟ་བུར། བཅོམ་ལྡན་འདས་ཀྱིས་བསྲུང་བ་དང་། བསྐྱབས་པ་དང་།
iiif viewer powered by OpenSeadragon
