| e-texts navigator |
| Wylie |
297a1 ཡེ་ཤེས་འཕགས་པ་ཐོས་པ་འཛིན། ། དེ་ཡི་སྤོབས་པ་དག་ཀྱང་རྒྱ་ཆེར་འགྱུར།། མི་གང་ཏིང་འཛིན་མཆོག་འདི་འཛིན་པ་ནི།། ལྷ་རྣམས་ཀྱིས་ཀྱང་མཆོད་པར་བྱ་བ
297a2 ཡིན། ། མིས་ཀྱང་རྟག་ཏུ་ཕྱག་བྱར་འོས་པ་སྟེ།། ཁོར་མོར་འབྱུང་བའི་ཚོགས་ཀྱིས་མངོན་པར་བསྲུང་།། མི་གང་ཏིང་འཛིན་མཆོག་འདི་འཛིན་པ་ནི།། དེ་དག་མེ་དང་ཆུར་ཡང་མི་འཆི་ཞིང་།། དེ་ལ
297a3 དུག་དང་མཚོན་གྱིས་མི་ཚུགས་ཏེ། ། དགྲ་དག་གིས་ཀྱང་བརྒལ་བར་མི་ནུས་འགྱུར།། མི་གང་ཏིང་འཛིན་མཆོག་འདི་འཛིན་པ་ནི།། དེ་དག་ནགས་ཁྲོད་གཤོང་གནས་རྟག་པར་ཡང་།། ལྷ་དག་ཁོར་མོར
297a4 བསྙེན་བཀུར་བྱེད་པར་འགྱུར། ། གནོད་སྦྱིན་མང་པོ་དེ་ཡི་གཡོག་ཀྱང་བྱེད།། མི་གང་ཏིང་འཛིན་མཆོག་འདི་འཛིན་པ་ནི།། ཡེ་ཤེས་དག་ཀྱང་རྒྱ་མཚོ་འདྲ་བར་འགྱུར།། ཐུབ་པའི་ཡོན་ཏན་བརྗོད་ལ་ཐོགས
297a5 པབ་མེད། ། སངས་རྒྱས་ཡོན་ཏན་ཡང་དག་བརྗོད་པར་བྱེད།། མི་གང་ཏིང་འཛིན་མཆོག་འདི་འཛིན་པ་ནི།། དེ་ཡི་ཐོས་པ་མཐའ་ཡས་མུ་མེད་དེ།། ཚད་སྙེད་མི་འགྱུར་ཇི་ལྟར་ནམ་མཁའ་བཞིན།། ཡེ་ཤེས
297a6 སྒྲོན་མ་འཛིན་ཅིང་རབ་རིབ་སེལ། ། མི་གང་ཏིང་འཛིན་མཆོག་འདི་འཛིན་པ་ནི།། རྟག་པར་འཇམ་ཞིང་རིགས་པའི་ཚིག་སྨྲ་སྟེ།། འཁོར་གྱི་ནང་དུ་དགའ་བར་འགྱུར་བ་སྟོན།། སེང་གེ་བཞིན་དུ་དེ་ནི་སྒྲ
297a7 རྣམས་སྒྲོག། མི་གང་ཏིང་འཛིན་མཆོག་འདི་འཛིན་པ་ནི།། དེ་དག་སྨན་པ་དཔྱད་མཁན་འདྲ་བར་ཡང་།། མང་པོའི་རྟེན་དང་དཔུང་གཉེན་སྐྱབས་སུ་འགྱུར།། འཇིག་རྟེན་དག་ན་སྣང་བར་གྱུར་ཅིང་སྤྱོད།།
iiif viewer powered by OpenSeadragon
