| e-texts navigator |
| Wylie |
216b1 ཤི་བའི་དུས་སུ་རྫ་ཞིག་བཞིན་དུ་འབོར།། ལྷན་ཅིག་སྐྱེས་པའི་ཤ་རུས་གཉིས་ཀྱང་འབྱེ།། དབང་མེད་བདག་ཉིད་གཅིག་པུའི་ཁྱམས་ནས་ནི།། ལས་ཀྱི་དབང་གིས་གང་དུ་སྐྱེས་གྱུར་ན།། དེ་བས་ལུས་ཀྱི་ཕྱིར་ནི་སྡིག་མི་བྱ།།
216b2 ལུས་འདིས་གཏིང་འགྲོ་སྟེ་ཆོག་མི་ཤེས།། མི་གཙང་ལས་བྱུང་མི་གཙང་ཕུང་པོ་ཡིན།། ན་རྒ་འཆི་སོགས་སྡུག་བསྔལ་ཀུན་གྱི་གནས།། ཤི་ནས་ལུས་པོར་ས་ཡི་ཕྱོགས་ཙམ་བཙཀ། བྱ་དང་ཁྱི་སྦྱང་ལ་སོགས་རྣམས
216b3 ཀྱིས་ཟ། ། བསྙེན་བཀུར་འབད་ཀྱང་འཆི་བདག་སྲིན་པོས་འཕྲོག། མཁས་པས་སྨོད་ཅིང་བླུན་པོ་ཆགས་པའི་གནས།། དེ་བས་མཁས་པ་ལུས་ལ་སུ་ཞིག་ཆགས།། ལུས་ཀྱི་ཕྱིར་ནི་ཡ་དར་འཇུག་མི་བྱ།། འདི་ལ་གླ་རྔན
216b4 གོས་ཟས་བྱིན་ནས་སུ། ། ཡུན་གྱི་ཕན་ཕྱིར་བསོད་ནམས་སོགས་ཏུ་གཞུག། བདག་གི་གྲོགས་ནི་དགེ་སྡིག་གཉིས་ལས་མེད།། དེ་ཡང་དགེ་བ་མཐོ་རིས་ཐར་པའི་རྒྱུ།། སྡིག་པ་ངན་སོང་སྡུག་བསྔལ་འབྱུང་བའི་རྒྱུ།།
216b5 མ་ཤི་བར་དུའང་ལུས་ནི་མི་རྟག་སྟེ།། བུ་ཆུང་བྱིས་པ་གཞོན་ནུ་ཉིད་དུ་འགྱུར།། དེ་ནས་དར་ལ་བབ་དང་དར་ཡོལ་དང་།། རྒས་པར་གྱུར་ཏེ་ལུས་འདི་རྟ་ག་ན་ནི།། གནས་སྐབས་དེ་སྐད་ཅིག་ནི་ཅིས་ཏེ་འགྱུར།།
216b6 ལོངས་སྤྱོད་བདེ་སྡུག་རྣམས་ཀྱང་མི་རྟག་སྟེ།། བཙན་ཕྱུག་འཇོམ་པ་སྡུག་ཕོངས་ཅན་དུ་འགྱུར།། སྡུག་ཕོངས་ཅན་ཡང་བཙན་ཕྱུག་འཛོམ་པར་འགྱུར།། ལང་ཚོ་ལོངས་སྤྱོད་ན་རྒ་འཆི་བས་འཇོམས།། འཇིག་རྟེན་ཆོས
216b7 འདི་ཐམས་ཅད་མི་རྟག་གོ། རྒྱལ་པོ་གཟུགས་ཅན་སྙིང་པོས་གསོལ་པ། བཅོམ་ལྡན་འདས་འཁོར་བ་འདིའི་སྡུ་བསྔལ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་ལ་ནམ་ཡང
216b8 བདེ་བ་མེད། ། བྱས་པ་ཐམས་ཅད་དོན་མེད་སྡུག་བསྔལ་རྒྱུ།། སྡུག་བསྔལ་གཙོ་བོ་སྐྱེ་རྒན་འཆི་བཞི།། དམྱལ་བར་སྐྱེས་ན་སྡུག་བསྔལ་འདི་འདྲའོ།། དམྱལ་སྲུང་ས་དང་ནི་དམྱལ་བའི་མི་མཐོང་ནས།
iiif viewer powered by OpenSeadragon
