| e-texts navigator |
| Wylie |
306b1 ཤེས་སོ། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་གལ་ཏེ་སེམས་ཅན་རྣམས་འཁོར་བའི་ཐོག་མའི་མཐའ་འཚལ་བ་མ་མཆིས་ན་ཇི་ལྟར་རྣམ་པར་ཐར་པ་ཁོང་དུ་ཆུད་པར་འགྱུར། བཅོམ
306b2 ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཐོག་མ་མེད་པའི་དུས་ཀྱིས་རྣམ་པར་སྤྲོས་པའི་གནས་ངན་ལེན་རྣམ་པར་རྟོག་པའི་བག་ཆགས་ཀྱི་རྒྱུ་འགག་ཅིང་རང་གི་སེམས་སྣང་བ་ཙམ་དུ་མཐོང་བའི་ཚེ་ཤེས་སོ།། ཕྱི་རོལ
306b3 དོན་དང་། རྣམ་པར་རྟོག་པའི་ལུས་གནས་གྱུར་པ་ལ་ཐར་པ་ཞེས་བྱའོ།། འཛག་པ་ནི་མ་ཡིན་ནོ།། དེ་བས་ན་མཐའ་མེད་པ་ཞེས་བྱ་བ་ནི་ཅི་ཡང་མེད་པ་མ་ཡིན་ཏེ། དེ་དག་རྣམ་པར་རྟོག་པའི་ཕྱིར་མཐའ་མེད་པ་ཞེས་བྱ་བ་ལ་སོགས་པ
306b4 མིང་གི་རྣམ་གྲངས་བྱས་པ་ཡིན་ནོ། ། ཕྱི་དང་ནང་གཉིས་ཀ་རབ་ཏུ་བརྟགས་ན་རྣམ་པར་རྟོག་པ་ལས་ལོགས་ཤིག་ན་གཞན་ཐ་དད་པའི་སེམས་ཅན་གང་ཡང་མེད་པས་ཤེས་པ་དང་། ཤེས་བྱ་དང་། ཆོས་ཐམས་ཅད་ནི་རབ་ཏུ་དབེན
306b5 པ་ཡིན་ཏེ། རང་གི་སེམས་སྣང་བའི་རྣམ་པར་རྟོག་པ་ཡོངས་སུ་མ་ཤེས་པའི་ཕྱིར་རྣམ་པར་རྟོག་པ་སྐྱེའི་གལ་ཏེ་ཡོངས་སུ་ཤེས་པར་གྱུར་ན་ནི་ལྡོག་པར་འགྱུར་རོ།། དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་བྱིར
306b6 ཚིགས་སུ་བཅད་པ་འདི་དག་གསུངས་སོ། ། འདྲེན་པ་རྣམས་ནི་རབ་བརྟགས་ན། གང་གཱའི་ཀླུང་གི་བྱེ་མ་བཞིན།། འཇིག་པ་མེད་ཅིང་འགྲོ་བ་མེད། མཐར་ཐུག་མིན་པའང་མ་ཡིན་ཏེ།། དེ་ན་མཉམ་པ་ཉིད་དག་གིས།། དེ་བཞིན་གཤེགས
306b7 རྣམས་བརྟགས་པ་ཡིན། ། གང་གཱའི་བྱེ་མ་ལ་སོགས་ལྟར།། ཉེས་པ་ཐམས་ཅད་རབ་སྤངས་ཏེ།། རྒྱུན་ཕྱོགས་འཇུག་ཅིང་རང་བཞིན་རྟག། དེ་ནི་སངས་རྒྱས་སངས་རྒྱས་ཉིད།། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཡང
306b8 བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་ཆོས་ཐམས་ཅད་སྐད་ཅིག་མར་འཇིག་པའི་མཚན་ཉིད་བཤད་དུ་གསོལ། བཅོམ་ལྡན་འདས་ཇི་ལྟར་ན་ཆོས་ཐམས་ཅད་སྐད་ཅིག་མ་ལགས། བཅོམ་ལྡན་འདས
iiif viewer powered by OpenSeadragon
