| e-texts navigator |
| Wylie |
220b1 པར་ཤར་བ་བཞིན། ། བདེ་གཤེགས་འཇིག་རྟེན་སྣང་མཛད་པའང་།། བྱིས་པ་རྣམས་ལ་ཡང་དག་ཆོས།། རབ་ཏུ་རྣལ་འབྱོར་གསུང་རིགས་ན།། ཅི་སླད་ཡང་དག་གསུང་མི་མཛད།། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ
220b2 བཀའ་སྩལ་པ། ཅི་སྟེ་ཡང་དག་བཤད་དུ་ནི།། དེ་ཡི་སེམས་ལ་ཡང་དག་མེད།། ཇི་ལྟར་རྒྱ་མཚོའི་དཔའ་རླབས་དང་།། མེ་ལོང་གཟུགས་བརྙན་རྨི་ལམ་དག། དེ་དག་ཐམས་ཅད་ཅིག་ཅར་སྣང་།། སེམས་ཀྱི་སྦེད་ཡུལ་དེ
220b3 བཞིན་ནོ། ། ཡུལ་རྣམས་དང་ནི་མི་ལྡན་ཕྱིར།། རིམས་ཀྱིས་ལས་དག་འཇུག་ཅིང་སྐྱེ།། རྣམ་པར་ཤེས་པས་རྣམ་པར་རིག། ཡིད་ནི་དེ་བཞིན་སེམས་པར་བྱེད།། ལྔ་པོ་དག་ནི་སྣང་བར་འགྱུར།། དེ་ལ་གོ་རིམས་ངེས་པ་མེད།། ཇི
220b4 ལྟར་རི་མོའི་མཁན་པོ་དང་། ། རི་མོ་མཁན་གྱི་སློབ་མ་དག། རི་མོའི་དོན་དུ་ཚེན་འགྱེད་ལྟར།། ང་ཡི་བཤད་པའང་དེ་བཞིན་ནོ།། ཚེན་ལ་རི་མོ་ཡོད་མ་ཡིན།། སྨྱིག་གུ་དང་ནི་གཞི་ལ་མེད།། སེམས་ཅན་དགའ་བ་བསྐྱེད་པའི་ཕྱིར།།
220b5 ཚན་གྱིས་རི་མོ་མངོན་པར་བསྒྲུབས།། བཤད་པ་དག་ནི་གཞན་ཕྱིར་སྤྱོད།། ཡང་དག་ཉིད་ནི་ཡི་གེ་སྤངས།། རྣམ་འབྱེད་ལས་ནི་དང་པོ་པ།། རྣལ་འབྱོར་པ་ལ་ཡང་དག་བསྟན།། སོ་སོ་རང་རིག་ཡང་དག་ནི།། རྟོག་དང་རྟག་པར
220b6 ཏུ་སྤངས། ། རྒྱལ་བའི་སྲས་ལ་འདི་བསྟན་གྱི།། བྱིས་པ་ལ་ནི་གཞན་རབ་འབྱེད།། ཇི་ལྟར་སྒྱུ་མ་སྣ་ཚོགས་དག། སྣང་ཡང་ཡང་དག་མ་ཡིན་ཏེ།། དེ་བཞིན་བཤད་པ་སྣ་ཚོགས་ཀྱང་།། བྱ་བའི་རྗེས་སུ་གཞག་པ་ཡིན།། བཤད་པ
220b7 འཐུན་པར་མ་གྱུར་པ། ། དེ་ལ་བཤད་པ་མ་ཡིན་འགྱུར།། ཇི་ལྟར་ནད་པ་སོ་སོ་ལ།། སྨན་མཁས་དཔྱད་རྣམས་བསྟན་པ་ལྟར།། དེ་བཞིན་གཤེགས་པས་སེམས་ཅན་ལ།། མོས་པ་ཇི་བཞིན་རབ་ཏུ་སྟོན།། བརྩེབས་རབ་ཏུ་གསུངས་པ
220b8 ཡི། ། སོ་སོ་རང་གི་སྤྱོད་ཡུལ་ནི།། རྟོག་གེ་བ་ཡི་ཡུལ་མ་ཡིད།། ཉན་ཐོས་རྣམས་ཀྱང་སྐལ་ཡོད་མིན།། གཞན་ཡང་བློ་གྲོས་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་རང་གི་སེམས་སྣང་བའི་གཟུང་བ
iiif viewer powered by OpenSeadragon
