| e-texts navigator |
| Wylie |
335a1 ཞིང་ཀུན་དུ་རྒྱུ་ཞིང་རྟག་པར་དེ་བཞིན་གཤེགས་པའི་གཟུགས་ཀྱི་སྐུ་མཐོང་བ་དང་འབྲལ་བར་མི་འགྱུར་བ་དང་། རྣམ་པར་ཐར་པ་གསུམ་ལ་རབ་ཏུ་གནས་ཀྱང་སྙོམས་པར་མི་འཇུག་པར་སེམས་ཅན་གྱི་མོས་པ་ཇི་ལྟ་བ་བཞིན་དུ
335a2 སངས་རྒྱས་ཀྱི་ཞིང་གི་བཀོད་པ་ཡོངས་སུ་སྦྱངས་ནས་སྐད་གཅིག་མ་གཅིག་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ
335a3 གློག་ཐོབ་ཀྱིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་ཞུ་བ་ཞུས་པ། བླ་ན་མ་མཆིས་མི་ཡི་གཙོ།། མཁྱེན་དང་གཟིགས་པ་ཚད་མ་མཆིས།། མ་འདྲེས་ཆོས་ལ་བཞུགས་ནས་ནི།། འཇིག་རྟེན་རྣམས་ལ་ཕན་འདོགས་མཛད།།
335a4 སེམས་ཅན་ཀུན་ལ་སྙོམས་པར་གཟིགས།། འཇིག་རྟེན་ཀུན་གྱི་མགོན་སྐྱབས་མཛད།། ལོག་དང་ཡང་དག་ལམ་བསྟན་ནས།། མཐར་ཐུག་བདེ་ལ་འགོད་པར་མཛད།། ཡོན་ཏན་མཆོག་ནི་རབ་བསགས་པས།། རིན་ཆེན་སྣ་ཚོགས་ཕུང་པོ་འདྲ།།
335a5 འཇིག་རྟེན་ཤེས་རབ་ཉི་མ་ཁྱོད།། ཁམས་གསུམ་མཆོད་འོས་གཙོ་བོ་ལགས།། ཐེག་པ་ཆེན་པོ་བཀས་བཤད་ནས།། བྱང་ཆུབ་ལམ་ནི་རྫོགས་པར་མཛོད།། ཞལ་མཚན་ཟླ་བ་ཉ་བ་འདྲ།། ཞི་གནས་དག་ནི་ཕུན་སུ་ཚོགས།། ཉེར་ཞི་ཆོས་ནི་རབ་བསྟན
335a6 ནས། ། ཉོན་མོངས་རྣམས་ནི་ཞི་བར་མཛད།། བྱང་ཆུབ་སྤྱོད་པ་བཀས་བཤད་ནས།། སེམས་ཅན་རྣམས་ལ་ཕན་མཛད་གསོལ།། སངས་རྒྱས་ཞིང་དང་སྐུ་ཚེ་དང་།། གཟུགས་སྐུ་དང་ནི་འཁོར་རྣམས་དང་།། བྲནི་ལས་གསུམ་དང་ཆོས་རྣམས་ཀྱང་།
335a7 ཐམས་ཅད་ཀུན་ནི་རྣམ་པར་དག། བཅོམ་ལྡན་བྱང་ཆུབ་སེམས་དཔའ་ཡི།། རྣམ་དག་སྤྱོད་པ་བཀས་བཤད་གསོལ།། ཇི་ལྟར་འདུད་ནི་གདུལ་བར་བགྱི།། ཇི་ལྟ་ཆོས་ནི་བསྟན་པར་བགྱི།། ཇི་ལྟར་དྲན་པ་ཉམས་མི་འགྱུར།། ཁྱོད་ཀྱི་བཀས་ནི་བགས
335a8 དུ་གསོལ། ། ཇི་ལྟར་དཔའ་འོ་དག་གིས་ནི།། འཁོར་བ་ཀུན་དུ་ཞུགས་གྱུར་ཀྱང་།། མཚན་ཉིད་གཅིག་ལ་གནས་བགྱིད་ཅིང་།། ཆོས་ལ་རྟག་ཏུ་གཡོ་མི་འགྱུར།། ཇི་ལྟར་སངས་རྒྱས་རྣམས་ལ་ནི།། བསྟེན་ཅིང་མཆོད་པ་བགྱིས་ནས་ནི།། རྟག
iiif viewer powered by OpenSeadragon
