| e-texts navigator |
| Wylie |
17a1 ལམ་མོ། ། འཁྲུལ་པའི་ཕྱིར་ནི་འཁོར་བའོ།། མ་ཤེས་པའི་ཕྱིར་ནི་སེམས་ཅན་ནོ།། སྒྲོལ་བའི་ཕྱིར་ནི་གྲུའོ།། བསྐྱོད་པའི་ཕྱིར་ནི་དགྲོད་པའོ།། བདེ་བའི་ཕྱིར་ནི་བྱང་ཆུབ་པོ།། དྲན་པ་ངེས་པའི་ཕྱིར་ནི་སེམས་སོ།། མཁས
17a2 པའི་ཕྱིར་ནི་ཤེས་རབ་པོ། ། གསལ་བའི་ཕྱིར་ནི་ཏིང་ངེ་འཛིན་ཏོ།། བྱིན་པའི་ཕྱིར་ནི་གནས་སོ།། ཟླ་མེད་པའི་ཕྱིར་ནི་རབ་པོ།། ངོ་མཚར་བའི་ཕྱིར་ནི་མཆོག་གོ།། འཕགས་པའི་ཕྱིར་ནི་ཕུལ་ལོ།། དབང་བྱེད་པ་མེད་པའི་ཕྱིར་ནི་བླ་ན་མེད་པའོ།།
17a3 གཏིང་རིང་བའི་ཕྱིར་ནི་ཟབ་པའོ།། གབ་པའི་ཕྱིར་ནི་གསང་བའོ།། ཕྲ་བའི་ཕྱིར་ནི་གཏིང་དཔག་དཀའ་བའོ།། ཀུན་འབྱུང་བའི་ཕྱིར་ནི་ཆོས་སོ།། ས་ནོན་པའི་ཕྱིར་ནི་བྱང་ཆུབ་སེམས་དཔའོ།། མཐར་བྱིན་པའི་ཕྱིར་ནི་སངས་རྒྱས་ཏེ། སེམྲ།
17a4 དཔའ་ཆེན་པོ་དེའི་ཕྱིར་ན་རྣལ་འབྱོར་གྱི་ལམ་འདི་ཤེས་པར་བྱ་སྟེ། ལམ་འདི་ནི་ཆོས་ཐམས་ཅད་ཀྱི་གཞིའོ།། སངས་རྒྱས་ཐམས་ཅད་ཀྱི་ཡུམ་མོ།། དེ་ཅིའི་ཕྱིར་ཞེ་ན། ཆོས་ཐམས་ཅད་འདི་ལས་འབྱུང་བའི་ཕྱིར་ན་བཞིའོ།། མཐར
17a5 བྱིན་པའི་སངས་རྒྱས་ཀྱི་ལམ་འདི་ནས་གཤེགས་པར་གྱུར་ཏོ། ། དེ་ལྟར་སྟོང་པ་ཉིད་ཀྱང་ལམ་འདི་ནས་གཤེགས་པ་སྟེ། དེའི་ཕྱིར་ལམ་འདི་ཤེས་པར་བྱའོ།། དེ་ལྟར་ན་དེའི་ཕྱིར་ལམ་འདི་ནི་དེ་བཞིན་གཤེགས་པ་ཐམ་ཅད
17a6 ཀྱི་ཡབ་ཅེས་ཀྱང་བྱའོ། ། དེ་བཞིན་དུ་ཡུམ་ཞེས་ཀྱང་བྱ་བ་དང་། སྲས་ཞེས་བྱ་བ་དང་བདག་པོ་ཞེས་བྱ་བ་དང་། གདུང་ཞེས་བྱ་བ་དང་སྲོག་ཅེས་བྱ་བ་དང་། ནོར་ཞེས་བྱ་བ་དང་། བྲན་ཞེས་བྱ་བ་དང་། སྐུ་ཞེས་བྱ་བ་དང་། གསུང་ཞེས
17a7 བྱ་བ་དང་ཐུགས་ཞེས་བྱ་བ་དང་། ཡོན་ཏན་ཞེས་བྱ་བ་དང་། ཕྲིན་ལས་ཆེན་པོ་ཞེས་བྱ་བའོ།། དེ་ཅིའི་ཕྱིར་ཞེ་ན། ཐབས་ཆེན་པོ་དང་ཤེས་རབ་ཆེན་པོ་དང་། བྱང་ཆུབ་ཆེན་པོ་དང་། དབང་ཆེན་པོ་དང་། དེ་བཞིན་ཉིད་དང་། འདའ་བར་དཀའ་བ་དང་། ཆོས་ཉིད
17a8 ལ་ཟད་མི་ཤེས་པ་དང་། སྙིང་རྗེ་ཆེན་པོ་དང་། རྣམ་པར་བརྗིད་པ་དང་། སྣ་ཚོགས་སུ་སྟོན་པ་དང་། ཐམས་ཅད་དུ་མཁྱེན་པ་དང་། ཅིར་ཡང་འབྱུང་བ་དང་། མཛད་པ་སྣ་ཚོགས་པའི་ཕྱིར་དེ་དག་ནི་དེ་ལྟར་ཡིན་པར་ཤེས་པར་བྱའོ།། དེའི་ཕྱིར་ཡང་།།
iiif viewer powered by OpenSeadragon
