| e-texts navigator |
| Wylie |
265a1 ཀྱི་སྙིང་པོ་འདི་གཟུངས་སུ་བཟུང་ལ། ཕྱིས་མ་འོངས་པའི་དུས་ངན་པ་ན་སེམས་ཅན་ཐམས་ཅད་ལ་ཕན་པ་དང་། བདེ་བ་ཆེན་པོར་གྱིས་ཤིག་ཅེས་བཀའ་སྩལ་པ་ནས། བདག་དེའི་ཚེ་དེའི་དུས་ན་ས་དང་པོ་ལ་གནས་པ་ལས་གཟུངས
265a2 སྔགས་འདི་ལན་ཅིག་ཐོས་པ་ཙམ་གྱིས་འཕགས་ཏེ། ས་བརྒྱད་དུ་ཕྱིན་ཏོ།། དེའི་ཚེ་དེའི་དུས་ན་བདག་ཤིན་ཏུ་དགའ་བ་སྐྱེས་ནས་ཡིད་དམ་དུ་བཅས་པ། བདག་གི་དུས་སླད་མ་ལ་སེམས་ཅན་ཐམས་ཅད་ལ་ཕན་པ་དང་བདེ་བར་འགྱུར་བ་བགྱི་བའི་མཐུ
265a3 ཞིག་རྙེད་པར་འགྱུར་ན། བདག་གི་ལུས་འདི་ལ་ལག་སྟོང་དང་ལྡན་པར་གྱུར་ཅིག་ཅེས་སྨོན་ལམ་བཏབ་མ་ཐག་ཏུ་ལུས་ལ་ལག་པ་སྟོང་དང་མིག་སྟོང་ཚང་བར་བྱུང་བར་གྱུར་ཏེ། དེ་ནས་ཕྱོགས་བཅུའི་ས་ཆེན་པོ་རྣམ་པ་དྲུག་ཏུ་གཡོས་པར་ཕྱོགས
265a4 བཅུའི་སངས་རྒྱས་སྟོང་གིས་འོད་ཟེར་བཏང་ནས། བདག་གི་ལུས་ལ་ཕྱོགས་བཅུའི་སངས་རྒྱས་སྟོང་གིས་འོད་ཟེར་བཏང་སྟེ།། བདག་གི་ལུས་དང་ཕྱོགས་བཅུའི་འཇིག་རྟེན་མཐའ་ཡས་པར་སྣང་བ་ཆེན་པོར་མཛད་དོ།། དེའི་སླན་ཅད་ཀྱང་སངས
265a5 རྒྱས་མང་པོ་དང་འཁོར་མང་པོའི་ཚོགས་གྲངས་མ་མཆིས་པའི་ནང་ནས་ཡང་འདི་སྐད་དུ་ཐོས་ཏེ། བསྙེན་བསྐུར་བགྱིས་བླངས་ཏེ།། སེམས་དགའ་བ་དང་རབ་ཏུ་དགའ་བ་སྐྱེས་ཏེ། དགའ་བ་དཔག་ཏུམ་མཆིས་པ་ནས་ཡང་བསྐལ་པ་འབུམ་ཕྲག
265a6 གྲངས་མ་མཆིས་པའི་སྐྱེ་ཤི་ནི་ཤིན་ཏུ་ཕྲ་བ་ལས་ཐར་ཏེ་འཕགས་སོ། ། དེ་སླན་ཅད་རྟག་ཏུ་བཟླས་བརྗོད་པགྱི་སྟེ། གཟུངས་སུ་བཟུང་ནས་བསྒྱུད་མ་མྱོང་སྟེ། སྔགས་འདི་གཟུངས་སུ་འཛིན་པའི་སླད་དུ་བདག་གར་བྱུང་གར་སྐྱེས་ཀྱང་རྟག་ཏུ་སངས
265a7 རྒྱས་ཀྱི་སྤྱན་སྔར་པད་མ་ལ་རྫུས་ཤིང་སྐྱེས་ཏེ། མངལ་ཏུ་སྐྱེ་མ་མྱོང་ངོ་གལ་ཏེ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མའམ། དེ་མ་ཡིན་པ་གང་ལ་ལ་ཞིག་གཟུངས་སྔགས་འདི་འཛིན་པར་འཚལ་ན། སེམས་ཅན་ཐམས
265a8 ཅད་ལ་བྱམས་པ་དང་། སྙིང་རྗེ་ཆེར་བསྐྱེད་དོ།། ཐོག་མར་བདག་སྤྱན་རས་གཟིགས་ཀྱི་མིང་ནས་བརྗོད་ཅིང་སྨོན་ལམ་འདི་སྐད་དུ་གདབ་པར་བགྱིའོ།། ཐུགས་རྗེ་ཆེན་པོ་སྤྱན་རས་གཟིགས་ལ་ཕྱག་འཚལ་ལོ།། བདག་གིས་ཆོས་ཉིད་ཀུན་ཏུ་མྱུར
iiif viewer powered by OpenSeadragon
