| e-texts navigator |
| Wylie |
68a1 རྒྱ་གར་སྐད་དུ། ཤྲཱི་བཛྲ་སིད་དྷ་ཛྭ་ལ་སཾ་བ་ར་ཏ་ན་ཏྲ་རཱ་ཛཱ། བོད་སྐད་དུ།། དཔལ་རྡོ་རྗེ་གྲུབ་པ་དྲ་བའི་སྡོམ་པའི་རྒྱུད་ཀྱི་རྒྱལ་པོ།། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ།། འདི་སྐད་བདག་གིས་ཐོས
68a2 པ་དུས་གཅིག་ན། བཅོམ་ལྡན་འདས་དགའ་ལྡན་གྱི་གནས་རིན་པོ་ཆེའི་ཁང་བཟང་གི་ནང་ན་བྱང་ཆུབ་སེམས་དཔའ་བྱམས་པ་དང་། དགའ་བའི་འོད་དང་དྲི་མ་མེད་པའི་འོད་ལ་སོགས་པ་དཔའ་བོ་དང་རྣལ་འབྱོར་མའི
68a3 འཁོར་དཔག་ཏུ་མེད་པ་དང་། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་བཙུན་མོའི་བྷ་ག་ལ་སྙོམས་པར་ཞུགས་པའི་དུས་སུ་རིགས་སྒྱུ་མའི་དབང་དུ་མཛད་དེ། ཐམས་ཅད་ཀྱི་ལྷའི་ཕྱི་ནང་གསང་བ་བླན་མེད་པའི་མཆོད
68a4 བས་མཆོད་པའི་དུས་སུ་བྱང་ཆུབ་སེམས་དཔའ་བྱམས་པས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཐལ་མོ་སྦྱར་ནས་གསོལ་པ།། མགོན་པོ་ཐུགས་རྗེ་ཆེ་ལྡན་པ།། དེ་ཉིད་དོན་དམ་གང་ཡིན་པ།།
68a5 དཔལ་དང་རྡོ་རྗེ་དོན་དང་ནི།། དྲ་བ་སྡོམ་པ་རྒྱུད་ཀྱི་དོན།། ངེས་བསྟན་དོན་ནི་གང་ཡིན་པ།། དེ་ཉིད་བདག་ལ་བཤད་དུ་གསོལ།། བཅོམ་ལྡན་འདས་ཀྱིས་བཀའ་སྩལ་པ།། བྱམས་པ་ལ་སོགས་འཁོར་རྣམས་ཀུན།། ཕྱི་རོལ
68a6 དོན་ལ་གཡེང་བའི་སེམས། ། ནང་དུ་སྡུས་ལ་རྩེ་གཅིག་ཉོན།། དཔལ་ནི་གཉིས་མེད་ཡེ་ཤེས་ཏེ།། དེ་ཉིད་མཆོད་པའི་འོས་ཡིན་ལ།། གཉིས་མེད་བདེ་བས་མཆོད་པར་བྱ།། རྡོ་རྗེ་ཞེས་བྱ་ཡེ་ཤེས་ལྔ།། གཟུང་འཛིན་རྟོག
68a7 པས་མི་ཕྱེད་ཕྱིར། ། རྡོ་རྗེ་ཞེས་ནི་བསྟན་པ་ཡིན།། དེ་ཉིད་དོན་ལ་རྩེ་གཅིག་པས།། ཆོས་སྐུ་རྡོ་རྗེ་འཆང་ཆེན་པོའི།། ས་ནི་ངེས་པར་ཐོབ་པའོ།། དྲ་བ་ཞེས་པ་མང་པོའི་དོན།། ཀུན་རྫོབ་གཞན་རིག་ཏུ་བསྟན་པ།། གྲངས་མེད
68a8 རྒྱ་ཆེར་བསྟན་པ་ནི། ། ནམ་མཁའ་དང་མཚུངས་སྡོམ་པའི་དོན།། ནམ་མཁའ་དང་མཚུངས་རང་རིག་ནི།། སེམས་ཀྱི་དེ་ཉིད་སྟོང་པའི་རོ།། སྐད་ཅིག་དེའི་རྒྱུན་ཉིད་ལ།། རྒྱུད་ཅེས་བྱ་བར་བསྟན་པ་ཡིན།། དཔལ་རྡོ་རྗེ་གྲུབ་པ
iiif viewer powered by OpenSeadragon
